مرکزی بانک ایشلاوچی‌لری مینیلگن موتر هجوم گه دوچ کیلگنیدن بیر آیدن آرتیق اوتماقده. مذکور حادثه‌ده مرکزی بانک عمومی علاقه‌لر مصلحتچیسی و طلوع نیوز سابق خبرچیسی یما سیاووش، ایکی ایشداشی بیلن جان بیردی. مرکزی بانک گه علاوه ایچکی ایشلر وزیرلیگی، ملی خوفسیزلیک ریاستی و جمهورلیک ریاستی نینگ بیرینچی اورین‌باسرلیگی بو حقده آرتیق تفصیلات قولگه کیلگنیدن خبر بیرگن ایدی، بیراق اولر حاضرگچه جیم تورگن.
مذکور قضیه نی تعقیب قیله‌دیگن خبرچی‌لردن قطاری نینگ ایتیش‌لریچه، بیر آیدن آرتیق اوتیشی بیلن مذکور حادثه نینگ قنده‌یلیگی و یما سیاووش نیگه اولدیریلگنی توغریسیده حاضرگچه قربانیلر عایله‌سی، رسانه‌لر و اهالی نینگ سوراق‌لریگه جواب بیریلمه‌گن.
طلوع نیوز نینگ خبرچیسی تمیم حمید نینگ ایتیشیچه، حاضرهم امنیتی نهادلر تامانیدن رسانه‌لرنینگ اختیاری گه قرار بیریله‌دیگن تفصیلات، حادثه کونی یا-ده حادثه نینگ ایرته‌سی کونی رسانه‌لرگه بیریلگن معلومات دیر.
اونینگ سلام‌وطندارگه ایتیشیچه: «حاضر هم بیللی ایمس کیم بو ماین قنده‌ی موترگه جایلشتیریلگن؟ حاضر هم مرکزی بانک و مذکور بانک مسئوللری بو حادثه حقیده رسانه‌لرگه علاوه امنیتی نهادلرگه ییترلیچه معلومات نی شریک قیلمه‌گن.»
«یک» تلویزیونی خبرچیسی شکیب مولوی‌زاده نینگ ایتیشیچه، مذکور حادثه حقیده کیره‌کلی معلومات نی مسئول نهادلردن قولگه کیلتیرمه‌گنلر «گرچند اوتگن هفته جمهورلیک ریاستی نینگ بیرینچی اورین باسرلیگی بو قضیه توغریسیده معلومات قولگه کیلگنی نی بیلدیرگنی ایدی، بیراق بو معلومات نینگ نیمه‌لیگی نی هیچ کیم بیلمه‌یدی.»
ملی خوفسیزلیک ریاست سوزلاوچیسی حارث جبران نینگ سلام‌وطندارگه ایتیشیچه، یما سیاووش نینگ قضیه‌سی قیین دیر و اونینگ کوپینچه زمان گه احتیاجی بار. اونگه کوره، ملی خوفسیزلیک ریاستی بو قضیه اوستیگه ایشلماقده و اونینگ یاشیرین تامان‌لری آچیق‌لنگنیدن کیین، تفصیلاتی رسانه‌لربیلن شرک قیلینه‌دی.
عین حالده، یما سیاووش نینگ عایله‌سی اونینگ جان بیرگنیدن کیین، بو حادثه انیق‌لنیشی اوچون حکومت گه بیر آی فرصت بیرگن ایدی.
یما سیاووش نینگ آته‌سی محمدداوود سیاووش توییتر صحیفه‌سیده یازیشیچه، حکومت اولرنینگ بیرگن وقتی یکونلنگونگه قدر، اوغلی نینگ قاتلی نی تاپیشی کیره‌ک، بولمه‌گن حالده اوغلی نینگ قاتلی حکومت دیر.
ایکی کون آلدین (دوشنبه ۱۷- قوس) کابل بوییچه غربی مملکتلرنینگ سیاسی نماینده‌لیک‌لری و خلق‌ارا تشکیلاتی رسانه نماینده‌لری، مذهبی گروهلر و رهبرلر، انسان حقلریدن حمایت قیلووچیلر، طلبه‌لر، مدنی جماعه‌چیلیک و تینچ‌اهالی گه قرشی سونگی ریجه‌لنگن و ناقانونی هجوم‌لرنی قاره‌لگن ایدی.
مذکور سیاسی نماینده‌لیکلر قوشمه بیر اعلامیه ترقه‌تیب ایتیش‌لریچه، طالبان و ترورچیلیک تشکیلاتلری افغانستانده‌گی تینچ‌اهالی تلفاتی نینگ کوپینچه‌سینی عاملی دیر.