اوشبو هفته یک‌شنبه کونی، سپین‌بولدک_چمن چیگره‌سیده قوراللی بیر کیشی تامانیدن پاکستان‌لیک بیر حربی اوققه توتیلیب اولدیریلیشی و باشقه نیچه کیشی یره‌لنگنیدن کیین، اوشبو چیگره یاپیلگن.
قندهار سوداگرلیک و سرمایه یاتقیزیش مسئوللری نینگ ایتیشلریچه، ایکی کوندن بویان سپین‌بولدک_چمن بندری ده سوداگرلیک توارلری آرتیلگن یوزلرچه موتر بند قالیشی باعث، تجارلر گه آغیر مالی زیان ییتکیزگن.
اوشبو اتاق اورین باسری عبدالباقی بینا نینگ سلاموطندار گه ایتیشیچه، اسلام امیرلیگی و پاکستان چیگره‌چیلری آره‌سیده‌گی جنجل، تیزلیک بیلن مذاکره آرقه‌لی حل ایتیلیشی کیره‌ک.
بیزلرنینگ فیسبوک صحیفه‌میزگه باش اورینگ!
ایتیش کیره‌ک که، سپین‌بولدک_چمن بندری یاپیلیشی بیلن چیگره ایکی تامانیده مینگلب کیشی بند قالگن و قوم بویوک‌لری نینگ سعی و تلاشی باعث، اوتگن کون شام دن بویان اوشبو کیشیلر نینگ باریب_کیلیشی اوچون فرعی یول آچیلگن.
محلی بیر منبع اسمی سر قالیش شرطی بیلن سلاموطندار گه ایتیشیچه، یولنی آچیش چاغیده ایکی پاکستان‌لیک اولگن و باشقه تورت کیشی گوجوم‌لیک باعث هلاک بولگنلر.
عین‌حالده، قندهار حاکمی سوزلاوچیسی عطاءالله زید گه کوره، یولنی آچیش اوچون پاکستان تامانی بیلن مذاکره قیلیش گه تلاش قیلگنلر؛ لیکن بو ایشگه مؤفق بولیشمه‌گن.
باشقه تاماندن اسلام امیرلیگی سوزلاوچیسی ذبیح‌الله مجاهد اوز توییتری ده یازیشیچه، اسلام امیرلیگی سپین‌بولدک_چمن بندرگاهیده یوز بیرگن توقنشوودن تأسف بیلدیره‌دی.
اونگه کوره، واقعه‌نی تیکشیریش و عامللرینی قولگه آلیش اوچون یوقاری مرتبه‌لی هیأت تشکیل ایتیلگن و تیکشیروولرینی هم باشله‌گن.
بیزلرنینگ توییترده هم تعقیب قیلینگ!
اونینگ یازیشیچه، اسلام امیرلیگی خوفسیزلیک اداره‌لری، کیله‌جک ده بو گَل واقعه یوز بیرمسلیگی مقصدیده سعی و حرکت قیلماقده‌لر.
عین‌حالده، محلی منبع‌لر نینگ ایتیشلریچه، پاکستان رسمی‌لری، اوشبو مملکت نینگ چیگره‌چیلری اولدیریلیشی انیقلنمه‌گونچه، سپین‌بولدک_چمن نی آچمسلیکلرینی ایتگنلر.
بونگه علاوه، پاکستان تامانی اوتگن کونی چیگره ایکی تامانی قوم بویوک‌لری نینگ ییغیلیشیده، افغانستان تامانی نماینده‌لریدن پاکستان نظامی‌لرینی اوققه توتگن کیشینی اولر گه تاپشیریش‌لرینی سوره‌گنلر.
