بدخشان ولایتی‌ده اوتگن کون (شنبه، ۲۹-میزان)، اوزبیک تیلی ملی کونی‌دن نشانلش مقصد یولگه قوییلگن احتفال‌ده مدنیتچیلردن قطاری، بدخشان ولایتی مکتبلریده اوزبیک تیلی‌ده کتاب‌لر نینگ ترقه‌تیلیشی و اوشبو ولایت بیلیم یورتی‌ده اوزبیک تیلی و ادبیات دیپارتمنتی نینگ آچیلیشی نی ایسته‌گنلر.
بدخشان ده اوزبیک مدنیتچیلریدن بیری و اوشبو احتفال تشکیلاتچیسی مسعود تیمور نینگ سلاموطندار گه ایتیشیچه، اولر هویت و تیللری گه حرمت قیلیش و قدرلش اوچون مذکور احتفال نی یولگه قوییگنلر.
جناب تیمور نینگ کوپه‌یتیریشیچه: «بو احتفال نی یولگه قوییگنی‌میزدن مقصد، ایسته‌کلریمیز نینگ حکومتی مسئوللر گه ییتیشتیریش دیر. بدخشان بیلیم یورتی‌ده اوزبیکچه بولیمی نینگ ایجاد بولیشی نی ایسته‌میز، چونکه ییگیت‌لریمیز حاضر تیللری نینگ رواجلنیشی خصوصیده ایشلری نی بیلمه‌گنلر، انه شوو سبب اوزبیکچه بولیمی نینگ آچیلیشی کیره‌ک که بو رقم ییگیت‌لریمیز اوز آنه تیللری خصوصیده تحصیل کوریب و بو کبی برنامه‌لر نینگ یولگه قوییشلری نی ایسته‌یمیز.»
بدخشان ده اوزبیک مدنیتچیلریدن باشقه بیری نورالحق حلیم‌اوغلو نینگ سلاموطندار گه ایتیشیچه، اولر تیللری نینگ رواجلنیشی و قوللب-قوتلنیشی و شونینگدیک اوز تیللری گه حرمت قایل بوله‌دیگن بیر نسل نینگ پرورش بیریش اوچون، بو کبی برنامه‌لر نینگ یولگه قویه‌دیلر.
اونگه کوره، مقصدلری گه ایریشیشلری و معارف بولیمی‌ده اولر بیلن همکارلیک بولینیشی خصوصیده حکومت نینگ حمایتی گه نیازلری بار. «بو ولایت نینگ پامیر نقطه‌سیدن که او ییرده قرغیزلر حیات کیچیره‌دی باشلنیب و ارگو تومنی گه قدر اوشبو ولایت نینگ برچه منطقه‌لریده ترک‌تبارلر حیات کیچیره‌دی. اوز هویت‌لری خصوصیده ایشلش گه حقلری بار. بو منطقه‌لرده‌گی مکتبلرده اوزبیک تیلی کتاب‌لری نینگ ترقه‌تیلیشی کیره‌ک که کیله‌سی نسل‌لر اوز تیللری و فرهنگلری خصوصیده ییترلیچه معلومات قولگه کیلتیرسینلر.»
عین حالده، ۲۹-میزان اوزبیک تیلی ملی کونی‌دن نشانلش اوچون اوشبو احتفال گه قتنشگن اوزبیک ییگیت‌لردن عبدالرحمن شهرانی نینگ ایتیشیچه، کوپینچه قیین‌چیلیکلر جمله‌دن بدخشان بیلیم یورتی‌ده اوزبیک تیلی و ادبیات دیپارتمنتی یوقلیگی و اوزبیکچه‌ده درسی کتاب یوقلیگی بیلن روپه‌ره‌لر.
احتفال گه شرکت قیلگن ییگیت‌لردن بیری کفایت‌الله اکبری، اوشبو ولایت‌ده اوزبیکچه بولیمی نینگ آچیلیشی نی ایسته‌ب سلاموطندار گه ایتیشیچه: «بیر اوزبیک ییگیتی صفتیده اوز تیلیم حقیده اورگنیش و معلومات آلیش گه قیزیققن‌مین. ۱۲ ییل مکتب اوقیدیک، بیراق اوزبیک تیلی کتابی یوق ایدی و شو رقم بیلیم یورت‌ده اوزبیک بولیمی نی اوقیماقچین بولسه‌ک اوزبیکچه بولیمی یوق. خلاصه قیین‌چیلیکلر بیلن روپه‌ره‌میز. دولت‌دن اوشبو قیین‌چیلیکلریمیز نینگ حل بولینیشی نی ایسته‌میز.»
شونده‌ی بیرحالده، بدخشان محلی مسئوللری اوشبو ولایت‌ده اوزبیک تیلی ملی کونی مناسبتی بیلن یولگه قوییلگن احتفال‌دن حمایت قیلیب ایتیشلریچه، دایم فرهنگی فایده‌لی برنامهلردن حمایت قیلیشلری ممکن.
بدخشان معلومات و مدنیت ریاستی نینگ ییگیتلر مدیری عطا‌الله ادیب نینگ سلاموطندار گه ایتیشیچه، اولر دایم بیر جمعیت نینگ فرهنگی و تیلی رواجلنیشی خصوصیده یولگه قوییلگن برنامهلردن حمایت قیلیش اوچون سعی و حرکت قیلگنلر.
جناب ادیب نینگ کوپه‌یتیریشیچه: «بو کبی برنامه‌لر گه مادی بولسین یا-ده معنوی کوچی‌میز ییتیشگونچه سعی و حرکت قیله‌میز و تیللری نینگ رواجلنیشی نی ایسته‌گن مذکور مدنیتچیلر و ییگیتلر یانیده دایم توخته‌یشیمیز ممکن.»
ایتیش کیره‌ک که، اسلام امیرلیگی نینگ قیته قدرت گه ایریشگنی‌دن کیین، بیرینچی مرته دیر کیم، بدخشان ده اوزبیک تیلی ملی کونی‌دن نشانلنگن.
