فاریاب ولایتیده خیریه بیر نهاد تامانیدن اوروش‌لر نتیجه‌سیده، بدرغه بولیب خیمه‌لر آستیگه حیات کیچیره‌دیگن باله‌لر اوچون تعلیمی بیر مرکز ایجاد ایتیلگن.
مذکور خیریه نهاد مسووللری نینگ ایتیش‌لریچه، فاریاب ولایتی نینگ بیرقطار تومن‌لریده اوروش‌نی دوامی بولگنی سبب، مکتب‌لرنینگ دروازه‌لری باغلنگن و کوپ قطار باله‌لر تعلیم کوریشدن محروم قالگنلر.
مذکور خیریه نهاد نینگ فرهنگی بولیمی مسوولی سلیم خاقان عزیزی نینگ ایتیشیچه، اوروش‌لر باعث، کوپ قطار عایله‌لر بدرغه بولیب میمنه شهریده کیلگن‌لر و خیمه‌لر آُستیگه تیریک‌چیلیک قیله‌دیلر. اونینگ کوپه‌یتیریشیچه، بدرغه بولگنلرنینگ باله‌لری اوچون تعلیمی بیر مرکز قوریلگن و بو مرکز ده ایرکک و قیز شامل کمیده ۳۰ باله تعلیم کوره‌دی.
جناب عزیزی نینگ ایتیشیچه: «اوروش‌لر سبب، بدرغه بولگن باله‌لرنینگ درس‌لری کیینگه قالگن و انه‌شو سبب، اولرگه تعلیمی مرکز ایجاد قیلیب و بیر عیال و بیر ایرکک شامل ایکی اوقیتووچی تعیین قیلدیک.»
اوروش‌لر نتیجه‌سیده بدرغه بولیب خیمه آستیگه حیات کیچیره‌دیگن باله‌لردن بیری مهریه دیر. او، بدرغه بولگن باله‌لرگه تعلیم کوریش زمینه‌سی یره‌تیلگنیدن خرسندلیک بیلدیره‌دی.
مهریه نینگ ایتیشیچه، مذکور خیریه نهاد، بدرغه بولگن باله‌لر اوچون خیمه، فرش، تخته و باشقه تعلیم کوریش جهازلرنی فراهم قیلگن.
بدرغه بولگن باله‌لردن باشقه بیری راضیه نینگ ایتیشیچه، تعلیم کوریش زمینه‌سی یره‌تیلیشیدن خرسند، بیراق تینچلیک تامین‌لنیشی و قیته‌دن اوز اوی‌لریگه باریش‌نی ایسته‌یدی.
شونینگدیک، اوروش‌لر سبب، بدرغه بولگن عایله‌لر، حکومت و طالبان گروهی دن اوروش‌نی یکونلنتیریش‌لرینی سوره‌یدیلر. اولر، ایکی تاماندن باله‌لرنینگ تعلیم کوریش‌لریگه توسیق بولمه‌یش‌لرینی ایسته‌یدیلر.