عمران خان، نخست‌وزیر پاکستان در یک تماس تلفنی با امام‌علی رحمان، رئیس‌جمهور تاجیکستان، دربارۀ وضعیت افغانستان گفت‌وگو کرده است. دفتر ریاست‌جمهوری تاجیکستان اعلام کرده که این تماس تلفنی روز گذشته (شنبه، دهم میزان/مهر) انجام شده است.
براساس اعلام دفتر ریاست‌جمهوری تاجیکستان، در این تماس تلفنی رئیس‌جمهور این کشور و نخست‌وزیر پاکستان در زمینۀ منطقه با تأکید بر وضعیت افغانستان گفت‌وگو کرده‌اند. امام‌علی رحمان گفته است که وضعیت افغانستان هم‌چنان در مرکز توجه تاجیکستان است؛ زیرا همه روی‌دادهایی که در این کشور رخ می‌دهد، بر وضعیت امنیت منطقه به‌طور کلی تأثیر مستقیم دارد.
رئیس‌جمهور تاجیکستان تأکید کرده که ایجاد گفت‌وگوی جامع میان نیروهای مختلف یکی از عامل‌های مهم برای بازگرداندن صلح و ثبات در افغانستان است. آقای رحمان آماده‌گی کشورش برای همکاری با همه اطراف در این روند را اعلام کرده است.
سلام‌وطندار فارسی را در فیسبوک دنبال کنید
در همین حال، دفتر نخست‌وزیر پاکستان هم اعلام کرده است که عمران خان و امام‌علی رحمان بر اهمیت آشتی ملی در افغانستان تأکید کرده‌اند. عمران خان گفته است که نیازهای بشردوستانۀ مردم افغانستان به‌طور فوری رفع شود و جامعۀ بین‌المللی به این مردم کمک کند.
نخست‌وزیر پاکستان هم‌چنان بر اهمیت فوری مشارکت اقتصادی با افغانستان برای جلوگیری از بحران اقتصادی و تسکین رنج‌های مردم تأکید کرده است. او و امام‌علی رحمان توافق کرده‌اند که تماس‌های‌شان در این باره را ادامه دهند.
عمران خان که در بیست‌وششم سنبله/شهریور به دوشنبه، پایتخت تاجیکستان، برای شرکت در نشست سران سازمان هم‌کاری‌های شانگهای رفته بود، نیز با امام‌علی رحمان دربارۀ افغانستان رای‌زنی کرده بود. عمران خان تأکید کرده بود که میان تاجیکان افغانستان و طالبان آشتی می‌کند. او پس از این سفر اعلام کرد که گفت‌وگوهای خود برای شامل‌کردن تاجیک‌ها، هزاره‌ها و اوزبیک‌ها را با طالبان آغاز کرده است.
سلام‌وطندار فارسی را در توییتر دنبال کنید
از سویی هم، تنش‌ها میان طالبان و تاجیکستان، روسیه را نگران کرده است. روسیه از تاجیکستان و طالبان خواسته است که تنش‌ها را به‌طور قابل قبول برای هر دو طرف حل کنند. وزارت خارجۀ روسیه گفته است که براساس اطلاعات طالبان، ده‌ها هزار نیرو از واحدهای ویژه تنها در ولایت تخار و در مناطق مرزی جابه‌جا شده‌اند.
در مقابل، طالبان نیز تاجیکستان را به دخالت در امور داخلی افغانستان متهم کرده و نسبت به ادامۀ آن هشدار داده‌اند.
