خبرگزاری رویترز به نقل از پارلمان تاجیکستان امروز گزارش داده که قرار است دولت چین هزینۀ ساخت یک پایگاه برای واحد نیروهای ویژۀ پولیس این کشور را در نزدیکی مرز تاجیکستان و افغانستان تأمین کند.
براساس گزارش رویترز، این پایگاه در ولایت خودمختار گورنو_بدخشان، در کوه‌های پامیر ساخته خواهد شد. این منطقه با ایالت سین‌کیانگ چین و ولایت بدخشان افغانستان نیز هم‌مرز است. سخنگوی پارلمان تاجیکستان اما تأکید کرده است که هیچ نیروی چینی در این پایگاه مستقر نخواهد شد.
سلام‌وطندار فارسی را در فیسبوک دنبال کنید
این پایگاه در حالی در نوار مرزی افغانستان و تاجیکستان ساخته خواهد شد که هنوز هم تنش‌ها میان دوشنبه و حکومت امارت اسلامی پابرجاست. این تنش‌ها پس از آن اوج گرفت که امام‌علی رحمان، رئیس‌جمهور تاجیکستان از حکومت امارت اسلامی انتقاد کرد و از آنان خواست که به تمامی گروه‌های قومی در حکومت سهم دهند.
امارت اسلامی اما تاجیکستان را به مداخله در امور داخلی افغانستان متهم و یک نیروی ویژه را در مناطق شمالی کشور مستقر کرده است.
