هند بوییچه پولند ایلچی‌خانه‌سی نینگ ایتیشیچه، اوتگن هفته افغانستان گه تیگیشلی ینگی پوللرنینگ بیرینچی بولیمی نی مذکور مملکت گه تسلیم بیرگن و سونگی بولیمی ایسه میلادی ۲۰۲۰- ییل نینگ آخری گه قدر تسلیم بیریلیشی ممکن.
هند بوییچه پولند ایلچی‌خانه‌سی اوتگن کون (جمعه ۱۷- دلو) بیر اعلامیه آرقه‌لی ایتیشیچه، میلادی ۲۰۲۰- ییل ده افغانستان و (PWPW) ناملی پولندلیک بیر شرکت آره‌سیده امضالنگن قرارداد اساسیده، ۳۸۰ میلیون ینگی پول چاپ بولیشی ممکن. ینگی چاپ بولگن پوللرگه ۱۰، ۲۰، ۵۰ و ۱۰۰ افغانی‌لیک شامل بوله‌دی.
اعلامیه گه کیلیشیچه، اوشبو پوللر ینگی تکنالوژی بیلن تولید بولیب و سابق پوللرگه نسبتن صفتی یوقاری دیر.
شونده‌ی بیرحالده، نیچه کون آلدین نماینده‌لر کینگش اعضاسی، مذکور کینگش آرقه‌لی ایجابی آواز قولگه کیلتیرمه‌گن مرکزی بانک سرپرستی اجمل احمدی، ینگی پوللرنینگ یوزیگه امضا قیلیشی ممکن دیگن ایدی.
مرکزی بانک نماینده‌لری کینگشی نینگ خواطرلری گه جواب بیردی. بو بانک بیر اعلامیه آرقه‌لی، ینگی پوللر مرکزی بانک سابق سرپرستی واحدالله نوشیر نینگ امضاسی بیلن چاپ بولیشی ممکن دیدی.
شونینگدیک مرکزی بانک نینگ ایتیشیچه، جناب احمدی پوللرنینگ چاپ بولیشیدن نظارت قیلیش اوچون پولند گه سفر قیلیش گه قرار قیلگن ایدی کیم نماینده‌لر کینگشی نینگ خواطرلری باعث بو سفر لغو بولدی.