آریانا تلویزیونی ده فردین امینی نینگ همکارلری بو خبرنی تصدیقله‌گن. اونینگ ایشداش‌لریدن بیر قطاری نینگ ایتیش‌لریچه، فردین امینی نابیللی شکلده اولدیریلگن.
ایچکی ایشلر وزیرلیگی بو خبرنی تصدیقلب اعلام قیلیشیچه، بیرینچی معلومات اساسیده آریانا نیوز نینگ خبرچیسی فردین امینتی خودکش‌لیک قیلگن.
مذکور وزیرلیک سوزلاوچیسی طارق آرین بیر توییت یازیب ایتیشیچه، فردین امینی بوگون (جمعه ۲۱- قوس) توشدن آلدین کابل شهری نینگ ۱۷- حوزه‌سیگه تیگیشلی «منشی میرغلام» شهرچه‌سیده بارگن ایکن و تلیفونی بیر تماس‌دن کیین اوزینی اولدیرگن.
جناب آرین گه کوره، امینی اوتکیر بیر تاش بیلن گردنی نینگ کیسگن. طارق آرین نینگ ایتیشیچه، بو حادثه توغریسیده سندلر موجود دیر.
اونینگ کوپه‌یتیریشیچه، منشی میرغلام شهرچه‌سی نینگ قوروقچی‌لری فردین امینی نینگ خودکش‌لیگی نی آلدینی آلیش اوچون حرکت قیلگن، بیراق اولرنینگ سعی و حرکتی نتیجه بیرمه‌گن.
ایچکی ایشلر وزیرلیگی سوزلاوچیسی نینگ کوپه‌یتیریشیچه، فردین امینی ایمرجنسی کسلخانه‌سیگه انتقال تاپگندن کیین جان بیرگن. اونینگ ایتیشیچه، قضیه هر تامانلمه تیکشیریله‌دی.
شونده‌ی بیرحالده، اوتگن کون ننگرهار ده انعکاسی خصوصی تلویزیونی نینگ خبرچیسی ملالی میوند ترور ایتیلگن ایدی. خبرچی‌لردن مدافعه قیله‌دیگن نهادلرنینگ ایتیشیچه، میلادی ۲۰۲۰- ییل جریانیده ۱۰ خبرچی هلاک ایتیلگن.