ننگرهار محلی مقام‌لری، کابل بیلیم یورتی اوستیگه اویوشتیریلگن قانلی هجوم عامل‌لریدن باشقه بیری نینگ امنیتی کوچلر تامانیدن قولگه آلینگنیدن خبر بیرگنلر.
بوگون “پنجشنبه” ننگرهار حاکمی ضیاالحق امرخیل نینگ بو ولایتده خبری بیر ییغین اوتکزیب ایتیشیچه، ابوسعید اعظم گه تانیلگن حضرت علی باشقه ایکی کیشی بیلن بیرلیکده اوشبو ولایت نینگ اچین تومنیدن قولگه آلینگن.
اونینگ ایتیشیچه، مذکور عملیات اوتکن کیچه اچین تومنیده یولگه قویلگن ایدی. جناب امرخیل نینگ کوپه‌یتیریشیچه، قولگه آلینگن کیشی نینگ کابل بیلیم یورتی اوستیگه اویوشتیریلگن هجوم‌گه قولی بار ایکن و شونینگدیک، عراق، سوریه و بلجیم گه داعش گروهی نینگ رهبرلری بیلن ارتباط ده ایکن.
ملی خوفسیزلیک ریاستی نینگ ۰۲ قطعه‌سی بیر خبرنامه آرقه‌لی مذکور کیشی نینگ قولگه آلینگنی‌نی تصدیق‌لگن.
اوتگن ییل عقرب آیی‌ده ۳ هجومچی کابل بیلیم یورتی اوستیگه هجوم قیلیب اوقووچی‌لرنی اوققه توتگن ایدی. اعلان ایتیلگن آمارلرگه کوره، مذکور هجوم ده ۲۲ کیشی هلاک و باشقه ۴۰ کیشی یره‌لنگن.
طالبان گروهی اوشبو واقعه گه قولی بولگنی‌نی رد قیلگن ایدی، بیراق داعش گروهی بیر اعلامیه آرقه‌لی مذکور هجوم اولر تامانیدن اویوشتیریلگنی‌نی بیلدیرگن ایدی.