قندهار محلی مسووللری نینگ ایتیش‌لریچه، اوشبو ولایت نینگ دامان پولیس قومندانلیگی اوستیگه اویوشتیریلگن هجوم عاقبتیده، تینچ اهالی شامل ۳۳ کیشی یره‌لنگن.
قندهار حاکمی سوزلاوچیسی بهیر احمدی نینگ ایتیشیچه، بوگون “دوشنبه” ایرته‌لب ساعت ۱۰ اطرافیده پارتلش ماده یوکلنگن بیر موتر دامان پولیس قومندانلیگی‌نی هجوم آستیگه قرار بیرگن.
احمدی نینگ کوپه‌یتیریشیچه، بو واقعه‌ده ملی خوفسیزلیک ۲ ایشلاوچیسی، ۹ پولیس، تومن ۷ ایشلاوچیسی و ۱۵ تینچ اهالی شامل ۳۳ کیشی یره‌لنگن.
قندهار ولایتیدن کیم‌لیگی سیرقالیش‌نی ایسته‌گن امنیتی بیر منبع نینگ سلام‌وطندارگه ایتیشیچه، دامان پولیس قومندانی عبدالودود هم یره‌لنگنلر جمله‌سیدن دیر.
قندهار حاکمی سوزلاوچیسی نینگ کوپه‌یتیریشیچه، بو هجومده هیچ‌کیم هلاک ایتیلگن ایمس و کوپ قطار کیشی‌لر سطحی شکلده یره‌لنگن.
عین‌حالده، ایچکی ایشلر وزیرلیگی نینگ اعلان قیلیشیچه، اوشبو پارتلش دامان پولیس قومندانلیگی قرارگاهی یقینیده یوز بیرگن. ایچکی ایشلر وزیرلیگی سوزلاوچیسی طارق آرین نینگ ایتیشیچه، واقعه یوز بیرگن محلدن یره‌لنگن ۱۱ پولیس کسلخانه‌گه انتقال بیریلگن.
قندهار حوزه‌وی کسلخانه‌سی داکترلریدن بیری نینگ سلام‌وطندارگه ایتیشیچه، یره‌لنگنلردن ۷ ته‌سی اوشبو کسلخانه‌گه انتقال بیریلگن و ساغلیک وضعیت‌لری یخشی دیر.
باشقه تاماندن، قندهار امنیتی مسووللری اوشبو ولایت نینگ ژیری تومنی پولیس قومندانی شمس‌الله نینگ مهمانخانه‌سیده نیچه قول بمبی تشلنگنیدن خبر بیرگنلر. اولرنینگ ایتیش‌لریچه، بو واقعه‌ده هیچ‌کیم زیان کورمه‌گن، بیراق مهمانخانه تخریب بولگن.
حاضرگه‌قدر طالبان گروهی شامل هیچ‌بیر گروه بو هجوم‌لر مسوولیتی‌نی بوینیگه آلمه‌گن.