ملی مصالحه عالی کینگش سوزلاوچیسی فریدون خوزون نینگ سلام‌وطندارگه ایتیشیچه، افغانستان تینچلیگی خصوصیده روسیه ییغینی نینگ چقیروونامه‌سی ملی مصالحه کینگش باشلیغی عبدالله عبدالله گه ییتیشگن و او بو توغریده مصلحت قیله‌دی.
جناب خوزون گه کوره، مذکور ییغین جاری قویاش ییل ۲۸- حوت آیی گه یولگه قوییله‌دی و بو ییغین گه شرکت قیلیش اوچون دولت رهبرلری، سیاستچیلر، طالبان و منطقه مملکت‌لریدن قطاری گه چقیروونامه یوباریلگن.
خوزون نینگ کوپه‌یتیریشیچه، ملی مصالحه عالی کینگش باشلیغی بو ییغین گه شرکت قیلیش یا-ده قیلمه‌یش اوچون حاضرگچه قرار آلمه‌گن.
افغانستان اوچون روسیه خاص نماینده‌سی ضمیر کابلوف، بوندن آلدین افغانستان خصوصیده ییغین یولگه قوییلیشی حقیده ایتیشیچه، بو ییغین گه شرکت قیلیش اوچون آمریکا و باشقه بیر قطار مملکتلرگه چیقیروونامه یوباریله‌دی.
مذکور ییغین حقیده تشقری چیققن معلوماتلرنینگ کورستیشیچه، ملی اسلامی جنبش حزب رهبری مارشال عبدالرشید دوستم، اسلامی وحدت حزب رهبری کریم خلیلی، اسلامی حزب رهبری گلبدین حکمتیار و مملکت سابق جمهوررئیسی حامد کرزی بو ییغین گه شرکت قیلیش اوچون چقیریلگن.
بیراق حکومت رسمی‌لری و مملکت سیاستچی‌لری بو ییغین گه شرکت قیلیش توغریسیده حاضرگچه هیچ بیر نرسه دیمه‌گن. عین حالده، سیاسی ایش بیلرمان‌لردن قطاری نینگ ایتیش‌لریچه، روسیه آرقه‌لی بونده‌ی بیر ییغین یولگه قوییلیشی تینچلیک پروسه‌سینی تیزلشتیره‌دی.
سیاسی ایش بیلرمان فضل‌الرحمان اوریا نینگ ایتیشیچه، منطقه مملکت‌لر آره‌سیده اویغونلیک ایجاد قیلیش اوچون بو ییغین یولگه قوییله‌دی، بیراق افغانستان حکومت رسمی‌لری نینگ بو ییغینده اساسی نقشی یوق.
ایتیش کیره‌ک کیم شونینگدیک قطر ده افغانستانلیکلرارا سوزلشوولر یولگه قوییلمسدن آلدین مسکو ایکی مرته افغانستان سیاستچی‌لری و طالبان نماینده‌لری نینگ ییغینیدن میزبانلیک قیلگن ایدی.
بولرگه علاوه، سونگی پیت‌لرده طالبان مذاکره قیلووچی هیأت اعضالریدن قطاری مسکو باریب و روسیه رسمی‌لری بیلن اوچرهشگن.
