امارت اسلامی و تاجیکستان در باره‌ی گسترش روابط دوجانبه گفت‌وگو کردند

نورالله نوری، وزیر سرحدات، اقوام و قبایل امارت اسلامی، گفته که افغانستان تلاش دارد با تمام کشورها روابط اقتصادی و سیاسی داشته باشد.

وزارت سرحدات، اقوام و قبایل، روز گذشته -دوشنبه، ۲۶ عقرب- در خبرنامه‌ای در اکس نوشته که نوری این موضوع را در دیدار با هیئت تاجیکستان مطرح کرده است.

وزیر سرحدات، اقوام و قبایل، افزوده که جای خوش‌حالی است که امارت اسلامی و تاجیکستان گام‌های مؤثری برای گسترش روابط دوجانبه برمی‌دارند.

بر بنیاد خبرنامه، دو طرف در این دیدار در باره‌ی امنیت، گسترش روابط، مشکلات سرحدی و تثبیت سرحد مشترک، گفت‌وگو کرده اند.

هیئت تاجیکستان شنبه برای گفت‌وگو با مقام‌های امارت اسلامی به کابل آمد. در بیش از چهار سال گذشته، این نخستین سفر رسمی هیئت تاجیکستان به افغانستان است.