هیئتی از وزارت صنعت و تجارت به اوزبیکستان رفت

احمدالله زاهد، معین وزارت صنعت و تجارت امارت اسلامی، برای شرکت در فورم بین‌المللی سرمایه‌گذاری تاشکند، در رأس هیئتی به اوزبیکستان رفته است.

وزارت صنعت و تجارت، امروز (دوشنبه، ۲۵ جوزا) در اکس نوشته که هیئت عازم‌شده به اوزبیکستان در حاشیه‌ی این فورم با مقام‌ها، سرمایه‌گذاران و بازرگانان کشورهای گوناگون در باره‌ی گسترش هم‌کاری‌های اقتصادی، سرمایه‌گذاری و روابط تجاری، گفت‌وگو خواهد کرد.

این وزارت، ابراز امیدواری کرده که این سفر در معرفی ظرفیت‌های اقتصادی افغانستان و جذب سرمایه‌گذاری، نتیجه‌ی مثبت به هم‌راه داشته باشد.