محموله‌ی ۶۰ تنی کمک انسان‌دوستانه‌ی قطر، امروز (سه‌شنبه، ۲۹ حمل) به افغانستان رسید. یکی از دیپلمات‌های وزارت امور خارجه‌ی قطر، در جریان تحویل‌دهی این کمک‌‌ها، گفته که دولت این کشور به وزارت معارف افغانستان ۶۰ تن مواد ضروری شامل خرما، قرطاسیه و لباس مکتب به دانش‌آموزان دختر و پسر، کمک کرده است.
این دیپلمات وزارت امور خارجه‌ی قطر، افزوده است که کمک‌های این کشور به مردم افغانستان ادامه می‌یابد.
سلام‌وطندار فارسی را در تویتر دنبال کنید
در همین حال، وحیدالله هاشمی، رییس ارتباطات خارجه‌ی وزارت معارف افغانستان، با استقبال از کمک‌های قطر به این وزارت، می‌گوید که دولت قطر به رهبری وزارت معارف اطمینان داده است که به معارف افغانستان کمک می‌کند و این نخستین کمک قطر به معارف افغانستان است.
گفتنی است که قطر پیش از این نیز، به شهروندان افغانستان به ویژه زلزله‌زدگان، کمک کرده است.
