وزارت امور مهاجران و بازگشت‌کنندگان حکومت سرپرست، اعلام کرده که تاجیکستان ۴۹ شهروند افغانستان را اخراج کرده است.
در خبرنامه‌ی این وزارت که امروز (شنبه، ۱۰ جوزا) نشر شده، آمده که این افراد در روزهای هفت و هشت جوزا از تاجیکستان اخراج و از طریق شیرخان‌بندر در کندز وارد افغانستان شده اند.
به گفته‌ی مسئولان آمریت سرحدی شیرخان‌بندر، از میان این افراد، ۳۶ تن دارای شناس‌نامه‌ی تاجیکستان و ۱۲ تن دارای ویزا و گذرنامه بوده اند.
سلام‌وطندار را در تلگرام دنبال کنید
آمریت سرحدی شیرخان‌بندر، افزوده که این افراد با وجود داشتن مدارک اقامت قانونی، از سوی دولت تاجیکستان اخراج شده اند و دلیل این اقدام تا اکنون مشخص نیست.
وزارت مهاجران و بازگشت‌کنندگان، می‌گوید که بازگشت‌کنندگان پس از نام‌نویسی، کمک‌های انسان‌دوستانه دریافت کرده و به شهرها و ولسوالی‌های اصلی شان انتقال داده شده اند.
سلام‌وطندار را در اکس دنبال کنید
کمیساریای عالی سازمان ملل متحد در امور پناهندگان، پیش از این از تاجیکستان خواسته بود که مهاجران افغان را اخراج نکند.
بر اساس آمار این سازمان، تا پایان ۲۰۲۴، نزدیک به نُه هزار مهاجر افغان در تاجیکستان زندگی می‌کردند.
