له ټولو مخالفتونو سره ـ سره بیا هم کابل کې د برېښنايي پېژندپاڼو وېش لړۍ روانه ده.
د نفوسو د احوالو ثبت ادارې ویاند روحالله احمدزی وايي، تراوسه د برېښنايي پېژندپاڼو غوښتونکیو ته څه باندې ۴۰ زره فورمې وېشل شوېدي.
د ښاغلي احمدزي په وینا، د غوښتونکیو لوړه د دې شمېره لامل شوې چې دا اداره کابل کې د دوو مرکزونو پرانيستلو پروګرام په نظر کې ونیسي او ټاکل شوې دغه مرکزونه راتلونکیو ورځو کې پرانېستل شي.
ښاغلي احمدزي زیاته کړه چې د برېښنايي پېژندپاڼې ترلاسهکول وخت نیسي او هر متقاضي باید څلور پړاونه بشپړ کړي؛ نو له همدې امله دې ادارې تراوسه پورې ۱۵۰۰ تذکرې وېشلي دي.
د ده په وینا، دمګړۍ په کارتهچهار او وزیراکبرخان کې د پېژندپاڼو د وېش دوه مرکزونه فعاله دي چې دواړو شاوخوا ۴۰ زره فورمې وېشلې دي او ډېر ژر به دوه نور مرکزونه هم پرانیستل شي.
ښاغلی احمدزی همدارنګه وايي، کابل کې به د برېښنايي پېژندپاڼو وېش لړۍ ۶ میاشتې وخت ونیسي او وروسته له هغو به دغه بهیر په سترو ښارونو کې پيل شي.
برېښنايي پېژندپاڼو کې د ملت په توګه د افغان کلمې لیکل، دې برخه کې د اختلاف تر ټولو مهم لامل دی.
مخالفان پهدې باور دي چې افغان کلمه د ټولو قومونو هویت نه څرګندوي او دغه کلمه باید پېژندپاڼو کې ونه لیکل شي.
خو موافق لوری وايي، افغان کلمه افغانستان کې د ټولو مېشتو قومونو تاریخي او قانوني هویت دی او په برېښنايي پېژندپاڼو کې یې لیکل ضروري دي.
برېښنايي پېژندپاڼو کې د افغان کلمې لیکلو سره یو له مخالفانو اجرایوي رییس عبدالله عبدالله دی.
د اجرایوي ریاست ویاند مجیبالرحمن رحیمي سلاموطندار راډیو ته وویل، دوی پهخپل پخواني دریځ کلک ولاړ دي.
د ده په خبره، دغه بهیر غیرمشروع او یو اړخیز دی او د حکومت یوه لوری سره له سلاکولو پرته پیل شوی.
ښاغلی رحیمي پهدې اړه چې که د برېښنايي پېژندپاڼو وېشلو بهیر ونه درول شي؛ د اجرایوي ریاست بدیل څه دی؛ هېڅ نه وايي.
لهدې سره د ولسمشرۍ ماڼۍ مرستیال ویاند شاهحسین مرتضوي وايي، دغه بهیر د ولسمشر له لوري په رسمي توګه پیل شوی او پراختیا ورکول یې د نفوسو د احوالو ثبت ادارې دنده ده.
د برېښنايي پېژندپاڼو وېشلو څرنګوالي پر سر د ملي یوالي حکومت مشرانو ترمنځ د اختلاف نظر ترڅنګ یو شمېر هېوادوالو هم ځېنو ولایتونو کې د لاریون په ترسره کولو سره د دغه بهیر درولو غوښتنه کړېده.
