د عامې روغتیا وزارت مرستیال سلاکار وحیدالله مجروح وايي، د تېرو ۲۴ ساعتونو پر مهال په بېلابېلو ولایتونو کې ۳۴ تازه پېښې ثبت شوي چې په دې سره په هېواد کې د کورونا ویروس مثبتې پېښې ۵۵۵ ته ورسېدې.
د عامې روغتیا وزارت مسوولان وايي، ۸ پېښې په هرات، ۸ په کابل، ۵ په کندهار، څلور-څلور په بلخ او نیمروز ولایتونو، ۲ په میدانوردګ او یوه-یوه پېښه هم په غور، بادغیس او بغلان ولایتونو کې ثبت شوې ده.
د عامې روغتیا وزارت په هېواد کې د کورونا ویروس خپرېدو په اړه اندېښنه ښيي او وايي، تر اوسه د ۵ ناروغانو وضعیت د اندېښنې وړ دی.
په افغانستان کې تر اوسه پر کورونا ویروس ۳۷ اخته کسان ښه شوي او ۱۸ نور مړه شوي دي.
د ځینو رسنیو راپورونو له مخې، د ولسمشرۍ ماڼۍ شاوخوا ۲۰ کارکوونکي هم پر کورونا ویروس اخته شوي دي.
د راپورونو پر بنسټ، د دغو کسانو د ازموینو پایله مثبته ختلې او اوس قرنطین شوي دي.
