که څه هم کندوز د هېواد د جګړه ځپلیو ولایتونو له ډلې یو دی، خو د دغه ولایت یوشمېر فعالې ښځې تل هڅه کوي چې د اړ او بېوزله ښځو د پر ځان بسیاینې لپاره کاري اسانتیاوې برابرې کړي.
د کندوز د ښځو د انسجام شورا تازه د «تعاون» دفتر په مالي مرسته د ښځو لپاره د اچارو، چکني او مُربا کارخونه جوړه کړې ده.
د دغې کارخونې کارکوونکې خپله تولید کړې تُرشي او مُربا په بازار کې پلوري.
۳۵ کلنه زربيبي چې خاوند یې په جګړو کې له لاسه ورکړی او اوس د څلورو ماشومانو سرپرستي ور په غاړه ده، د دغې کارخونې یوه کارکوونکې ده. هغه وايي، مخکې به یې ماشومانو ته د یوې مړۍ ډوډۍ پیدا کولو لپاره ډېرې سختۍ ګاللې، خو اوس د دغې کارخونې له لارې کولای شي د ژوند اړتیاوې پوره او د کورنۍ د اقتصاد څرخ وګرځوي.
د کندوز یوه فعاله ښځه هاجره اسلمبیک د اړمنو ښځو لپاره د دغې کارخونې جوړول مهم بولي او وايي، ښځې کولای شي په دې کارخونه کې د کار له لارې د خپلو ماشومانو ورځنۍ اړتیاوې پوره کړي.
هغه له کندوزیانو غواړي چې د ښځو د ملاتړ او په ټولنه کې یې د پرمختګ لپاره د دغې کارخونې تولیدات وکاروي.
د کندوز د ښځو د انسجام شورا مسووله او د دغې کارخونې بنسټاېښودونکې ناهید قریشي وايي، اوس په یاده کارخونه کې ۵ ښځې چې د کور سرپرستي ور په غاړه ده، کار کوي.
قریشي وايي، په راتلونکي کې هم د اړمنو ښځو لپاره د کاري اسانتیاوو برابرولو په برخه کې ښه پروګرامونه په پام کې لري او له حکومته غواړي چې د ښځو د تولیداتو ډېروالي په برخه کې ورسره همکاري وکړي.
دا په داسې حال کې ده چې په کندوز کې ډېرو ښځو د خپلې کورنۍ سرپرست له لاسه ورکړی او د دا ډول کارخونو جوړول کولای شي هغوی پر ځان بسیاینې ته ورسوي.
