د افغانستان مرکزي بانک چارواکي وايي، چې په ۱۳۹۴ لمریزکال کې د بهرنیو پيسو پر وړاندې د افغانۍ ارزښت ۱۷سلنه رالویدلی و، خو په ۱۳۹۵ لمریز کال کې ۲ اعشاریه ۵ سلنه بیرته لوړ شوی دی.
دوی پروینا ۱۳۹۶ لمریز کال به اقتصادي او پانګونې ودې له اړخه ښه کال وي.
د مرکزي بانک رییس خلیل صدیق نن (شنبه ډسمبر۳۱مه) د یوې خبري ناستې پرمهال وویل، چې ددغه بانک یوه لاسته راوړنه د بهرنیو پيسو پر وړاندې د افغانۍ ارزښت ساتل ده.
د صدیق پر وینا د هېواد د پيسو زیرمه روان کال ۴۰۰ میلیونه ډالره زیاته شوې او ترڅنګ يې دغه بانک ۴۳ میلیارده افغانیو په ارزښت بیه لرونکې پاڼې هم پلورلي دي.
د مرکزي بانک رییس په هېواد کې د پيسو پړسوب ۴ اعشاریه ۶ سلنه بولي، خو بیا هم دغه حالت انديښمنونکی بولي.
د صدیق په اند ۱۳۹۶ لمریز مالي کال به په اقتصادي او پانګونې برخه کې له لاسته راوړنو ډک کال وي.
هغه وویل: "موږ وړاندوینه کوو چې ۱۳۹۶ لمریز کال به د پانګونې له اړخه په افغانستان کې یو ښه کال وي ددې ترڅنګ چې تاسې ستونزې هم اورﺉ د نړۍ اکثره هېوادونه وړاند وینه کوي چې له امنیتي اړخه ژمن یو افغان دولت هم جدي هوډ او ډاډ ورکوي چې د اقتصادي او پانکونې برخه کې ښه کال ولري."
د مرکزي بانک دغه خوشبیني داسې مهال ده، چې د اقتصاد پوهانو په اند راتلونکی کال به ښايي د نا امنیو او جګړو زیاتوالي په سبب له اقتصادي او پانګونو پلوه ستونزمن کال وي.
