ولسي جرګې په یوه ځانګړې غونډه کې د «ملي دسترخوان» پروګرام چې ولسمشر د شنبې په ورځ پرانېست، د رایو په ډېروالي رد کړ.
د ولسي جرګې د مالي او بودیجې کمېسیون منشي سیدعظیم کبرزاني په یاده غونډه کې وویل چې د «ملي دسترخوان» پروګرام د مالیې وزارت په ګډون له هېڅ بودیجوي واحد سره نه دی شریک شوی.
د نوموړي په وینا، حکومت د رسنیو له لارې د ملي دسترخوان پروګرام بودیجه ۲۴۴ میلیونه ډالر ښودلې وه، خو مالیې وزارت ویلي چې د یاد پروګرام لګښت ۲۸۰ میلیونه ډالره دی او ۳۶ میلیونه ډالره یې هم د لېږدرالېږد لپاره په پام کې نیول شوي دي.
هغه وايي، حکومت غواړي دا پیسې حیفومیل کړي. نوموړي د دغه پروګرام د رد دلایل د هغه ناموثریت یاد کړ او زیاته یې کړه چې جرګه غواړي دا پیسې پر پراختیايي پروژو ولګېږي.
د ولسي جرګې غړی عبدالرووف انعامي وايي، کومې پیسې چې حکومت غواړي پر ملي دسترخوان پروګرام یې ولګوي، د پراختیايي بودیجې د کمښت لپاره د نړیوال بانک مرسته شوې پیسې دي. د نوموړي په وینا، ټاکل شوې وه دا پیسې د ښوونځیو، سړکونو او نورو زېربنايي پروژو پر جوړولو ولګېږي.
د ملي دسترخوان پروګرام چې د وچې ډوډۍ د وېش پروګرام ځایناستې ده، دوه ورځې وړاندې د ولسمشر محمداشرف غني له لوري په رسمي ډول پرانستل شو. د حکومت په وینا، یاد پروګرام له ۲۴۴ میلیونه ډالره ډېر لګښت لري او له څلور میلیونه کورنیو سره د مرستې په پار پیل شوی دی.
د ولسي جرګې غړیو پرون ویلي وو چې د ملي دسترخوان پروګرام له دوی سره تر مشورې پرته پیل شوی او ډېر فساد پهکې دی.
د ولسي جرګې د غړیو په وینا، د ملي دسترخوان پروګرام هم د وچې ډوډۍ د وېش پروګرام په څېر ناکام دی او ښايي ډېر فساد پهکې وشي.
