د ننګرهار د ګمرک ریاست مسوولین وايي، د روان مالي کال په لومړۍ ربع کې یې ۲،۵میلیارده افغانۍ عواید را ټول کړي، چې د همدغه مالي کال د لومړۍ ربعې په پرتله په کې ۴،۱۴ میلیونه افغانۍ لوړوالی راغلی.
د ننګرهار د ګمرک رییس الهام الدین مظهر وویل، په تېر ۱۳۹۵ مالي کال کې د ټولو عوایدو اندازه ۱۲،۳ میلیارده افغانۍ وه، چې پروینا یې د روان مالي کال د لومړۍ ربعې عوایدو ته په کتو اوسنۍ راټولې شوې پیسې زیاتې دي.
مظهر وايي، که د روان مالي کال په کب میاشت کې د تورخم دروازه تړل شوې نه وی؛ د دوی د اټکل له مخې به یې په دې میاشت کې هم تر یو میلیون افغانیو زیات محصول را ټول کړی و.
د ګمرګ رییس وویل، د تشکیل پراختیا، د سیستم کمپیوټري کېدل، سوداګرو ته د حصولي فورمونو ژر چمتو کول او د ځینو نورو اسانتیایي تدبیرونو له امله د ګمرک عواید زیات شوي دي.
مظهر سلام وطندار سره په خبرو کې وویل، په ګمرک کې فساد شته؛ خو زیاته یې کړه، چې تر یوه بریده یې مخنیوی شوی دی.
د ګمرک رییس په بشپړه توګه د فساد له منځه وړل مبالغه ګڼي؛ خو پروینا يې د فساد په مخنیوي کې بېدرېغه هڅه کوي.
بل پلو د پوهنتون استاد او اقتصاد پوه پوهاند بشیردودیال سلام وطندار ته وویل، د ګمرکي سیستم کمپیوټري کېدل د فساد د مخنیوي له پاره ښه او اسانه لاره ده؛ خو دا هله شونې ده، چې کمپیوټر ته له رسېدو وړاندې په اسنادو او شمېرو کې لاسوهنه ونه شي.
پوهاند دودیال وايي، د وارداتو زیاتوالی د اندېښنې وړ ده؛ خو پروینا یې حکومت ته په کار ده، چې کورني تولیدات لوړ، د کارخانو او پانګوالو ستونزو ته زیات پام واړوي ترڅو له دې لارې عواید لوړ شي.
پوهاند بشیردودیال وايي، په حکومت کې د قوي ارادې او غوڅ دریځ نهشتوالي له امله په لویو لارو کې ځینې دولتي مامورین او امنیتي ځواکونه له سوداګرو غیرقانوني پیسې اخلي دغه راز ګمرکونو کې د فساد کچه لوړه ده؛ چې دا په خپله پر عوایدو او سوداګرۍ منفي اغیز پرېباسي.
