د پاکستان د قبایلي سیمې کرم ایجنسي په پاړه چنار کې د سبزیو په منډيي کې د چاودنې له امله ۲۰ تنه وژل شوي او ۵۰ نور ټپیان شوي دي.
په اسلام اباد کې د پاکستاني پوځ د عامه اړیکو ادارې رسنیو ته په لېږلې خبرپاڼه کې ویلي، چې ټپيان په الوتکو کې د پښتونخوا روغتونونو ته انتقال شوي دي.
دا چاودنه نن شنبه د (جنورۍ پر ۲۱مه) سهار مهال د عیدګاه په نامه د سبزیو په منډيي کې شوې ده.
د عیني شاهدانو په خبره، خلک په خپلو کارونو بوخت وو، چې یو ناڅاپه د چاودنې غږ واورېدل شو او هره خوا منډې شوې.
د خېبرپښتونخوا د مرکزي روغتون یو چارواکی وايي، د ۵۵ په شاوخوا کې ټپيان ور وړل شوي دي، چې د ځينو حالت د اندېښنې وړ دی.
تر چاودنې وروسته امنيتي ځواکونه او چارواکي د پېښې ځای ته رسېدلی او پلټنې کوي، چې چاودنه څرنګه شوې.
سیمه ييز چارواکي وايي، دا چاودنه په منډيي کې داسې مهال شوې، چې د خلکو زیاته ګڼه ګوڼه وه.
چارواکيو تراوسه د چاودنې د څرنګوالي په تړاو څه نه دي ویلي.
تر اوسه کومې وسله والې ډلې د پېښې د مسوولیت په اړه څه نه دي ویلي.
