په سمنګان ولایت امنیتي چارواکي په شخصي لګښت سرتېرو ته پوستې جوړوي

د سمنګان ولایت امنیتي مسوولین وايي، چې د دې ولایت د امنیې قوماندان د نه پاملرنې له امله په شخصي لګښت یې سرتېرو ته پوستې جوړې کړي دي.

د سمنګان مرکز ایبک ښار د درېیمې حوزې امر سید بشیر سلام وطندار سره په مرکه کې وویل، چې څو ځلې یې له امنیې قوماندانۍ د سربازانو له پاره د پوستو جوړلو غوښته کړې، خو د بودیجې تخصیص نه شتوالي له امله یې په خپلو پیسو سرتېرو ته پوستې جوړې کړي دي.

دی وايي، دغه کار یې د سرتېرو د روحیې د پیاوړتیا له پاره کړی دی.

تېره ورځ په ټولنیزو رسنیو کې د ایبک ښار د درېیمې امنیتي حوزې امر انځورنه خپاره شول، چې نوموړی له خامو خښتو د پوستو له پاره دېوالونه جوړوي.

د سمنګان ولایتي شورا غړی محمد هاشم سروري وايي، د دې ولایت د امنیې قوماندانۍ نه پاملرنه د پولیسو منسوبینو د روحیې ضعف لامل شوې او ډېرو هغو یې دندې خوشې کړي دي.

د ولایتي شورا د غړي په وینا، د سمنګان پولیسو لوجستیک کم دی او د دې ولایت د پولیسو وسلو او لباسونو ته پاملرنه نه کېږي.

سروري وايي، چې د دې ولایت د پولیسو درېیمه حوزه له څو کلونو راهیسې په کرايي سیمه کې فعالیت کوي او له څو میاشتو راهیسې د امنیې قوماندانۍ له خوا دغه کرایه هم نه ده ورکړل شوې.

محمد هاشم سروری خبرداری ورکوي، چې که د کورنیو چارو وزارت په همدې ډول د سمنګان پولیسو ته نه پاملرنه وکړي امنیت حالت به په دې ولایت لا خراب شي.

دی وايي، د کافي تشکیلاتو نشتوالی او د پولیسو نه امکانات د دې لامل شوي، چې د سمنګان ولایت په ځینو سیمو کې طالبانو له خلکو باج واخلي.

هڅه مو وکړه، په دې اړه د سمنګان ولایت د امنیې قوماندانۍ نظر هم واخلو، خو د بیا بیا اړیکو په نیولو هېچا ځواب رانه کړ.

سمنګان د افغانستان نسبي امن لرونکی ولایت دی، چې د دغه نسبي امن له امله مرکزي حکومت هم ورته کمه پاملرنه کوي.