وسلهوالو پرون مازدیګر شاوخوا ۳ نیمې بجې پر ټولګټو چارو وزارت او د شهیدانو او معلولانو د ملاتړ پر ادارې برید وکړ او تر ۱۰ ساعتو وروسته بېګا شپه یوه نیمه بجه پای ته ورسېده.
د پېښې شاهدان وایي، لومړی له سپین کرولاډوله موټره څلور بریدګر د ټولګټو چارو وزارت د شا دروازې مخې ته پلي کړل او موټر د وزارت فرعي دروازې ته نږدې وچاودېد او بریدګرو ورسره هممهال ډزې پیل کړې.
د دوی په وینا، بریدګرو پوځي جامې اغوستې وې او هره یوه سره یو بیک هم و.
د پېښې شاهدان احمدولي او بازمحمد وايي، د پېښې ځای ته نږدې ولاړ وو چې د ملي اردو په جامو او وسلو سمبال ۴ کسان له کوڅې راووتل. دوی وايي، یادو کسانو دوی ته له نږدې کېدو سره سم د شهیدانو او معلولانو ادارې پر ساتونکي ډزې وکړې، ۲ کسانو یې پیردارخانه تر اور لاندې ونیوله او موږ هم ښوونځي ته وتښتېدلو.
عیني شاهدان وايي، بریدګرو د اللهاکبر په ویلو د دروازې پولیس شهیدان کړل او د معلولانو ادارې لومړي پوړ ته ور ننوتل، هر څوک به چې پر مخه ورتلل، پر مرمیو او لاسي بمونو یې ويشتل.
د سلاموطندار خبریال د دغې خونړۍ پېښې ارزولو په موخه له ساعتونو وروسته د له نورو خبریالانو سره د ټولګټو چارو وزارت انګړ او ودانۍ ته ور ننوتلی چې په وینا یې په وزارت کې له لړزوونکي حالت سره مخ شوی.
د خبریال په وینا، د وزارت ټولې ادارې په وینو لړلې او سوځېدلې وې. دغه راز د معلولانو او شهیدانو د ملاتړ ادارې ودانۍ هم له ورته سرنوشت سره مخ وه.
د عامې روغتیا وزارت ویاند وحید مجروح وايي، په پېښه کې ۴۰ کسان وژل شوي او ۲۷ نور ټپیان دي چې ۱۱ یې ښځې او ۲۹ نارینه دي. د مجروح په وینا، د ۴ بریدګرو جسدونه یې هم عدلي طب ته لېږدولي دي. دغه راز په ټپیانو کې ۱۸ نارینه، ۷ مېرمنې او ۲ ماشومان شامل دي.
په همدې حال کې د کورنیو چارو وزارت ویاند نجیب دانش له بریدګرو سره د جګړې اوږدېدو لامل، په سیمه کې د خلکو کورونه یادوي. د نوموړي په وینا، امنیتي ځواکونو له ۳۵۷ ډېر کارکوونکي وژغورل او خپلو کورنیو ته یې واستول.
که څه هم تراوسه کومې ډلې د پېښې مسوولیت منلی نهدی، خو اجرایوي رییس عبدالله عبدالله یې پړه پر وسلهوالو طالبانو ور اچولې ده.
