.JPG)
د بغلان ولایت د مرکزي بغلان ولسوالۍ امنیه قوماندان سمنوال محب الله کوهستاني سلام وطندار سره په مرکه کې ویلي دي، چې د ساقي محمد په نوم یو کس تېره شپه د یکه توت په کلي کې خپله مېرمن د ترښځې په ګوزار سره وژلې ده.
کوهستاني وايي، چې دغه کس نیول شوی او په خپل جرم یې اعتراف کړی دی.
دی همدا ډول وايي، چې د ساقي محمد ورور او کلیوال له پېښې یو ساعت وروسته خبر تر لاسه کوي او د نوموړي کور ته ورځي.
تورن قاتل ساقي محمد له دې پېښې وروسته د ورور کور ته ورځي او د ورور کور ته د ګازو په وسیله اور ورته کوي، چې په دې پېښه کې یو تن وژل کېږي او د ښځو او ماشومانو په ګډون ۸ تنه نور ټپیان کېږي.
د مرکزي بغلان ولسوالۍ امنیه قوماندان د دې پېښې لامل کورنی تاوتریخوالی بولی.
دا په داسې حال کې ده، چې له دې مخکې د بغلان ولایت د ښځو چارو ریاست په دې ولایت کې د ښځو په وړاندې د تاوتریخوالي په کچه کې د ۲۶ سلنې کموالي خبر وکړي و.
