د سوېس په جينوا ښار کې د رسنیو او خبریالانو ملاتړ نړۍوال بنسټ، په خپل تازه راپور کې افغانستان د خبریالانو لهپاره یو ګواښونکی هېواد پېژندلی دی.
د دغه راپور پربنسټ په ۱۸ هېوادونو کې د روان کال په لومړیو ۴ میاشتو کې ۴۴ تنه خبریالان وژل شوي دي په داسې حال کې چې د تېرکال په لومړیو ۴ میاشتو کې دا شمېره ۲۸ تنه وه.
راپور وايي، افغانستان د ۱۱ تنو خبریالانو په وژل کېدو د خبریالانو لهپاره د خطرناکو هېوادونو نوملړ په سر کې ځای لري، مکزیک د ۴ خبریالانو په وژل کېدو، سوریه د ۴ خبریالانو په وژل کېدو، یمن د یو خبریال په وژل کېدو، اکوادور او هندوستان د ۳ خبریالانو په وژل کېدو په ترتیب سره په نوملړ کې راغلي دي.
دغه بنسټ افغانستان کې وروستي بریدونه چې ۹ خبریالان په کې ووژل شول په سختو ټکو غندلي دي.
په کابل ښار کې د اپریل په ۳۰ مه نېټه د یو ساعت په واټن کې دوه چاودنې وشوې چې په دویمه چاودنه کې د خبریالانو په ګډون ۲۹ تنه ووژل شول او ۴۰ تنه ټپیان شول.
