د کندهار ښار ډوډۍ پخوونکو د ډوډیو د بیو د ټیټوالي له امله د ډوډیو پخلنځایونه تړلي دي.
د دغه ولایت د ډوډۍ پخونکو اتحادي مشر نقیب الله رسول یار نن د ( سپټامبر په ۱۸مه) سلام وطندار سره په خبرو کې وویل، چې د کندهار ښاروالۍ له دوی غوښتي، چې یوه ډوډۍ په ۱۴ افغانۍ و پلوري.
د ده پر خبره، دا په داسې حال کې ده، چې دغه ټاکل شوې بیه د دوی په تاوان تمامېږي او زیاته کړه، چې دغې ټاکل شوې بیې له مخې نه شي کولای، د ګازو، وړو او د ډوډۍ پخوونکو معاشونه پوره کړي.
رسول یار وايي، چې د هرې معمولي ډوډۍ وزن ۴۰۰ ګرمه دی او زیاتوي، د د غه ولایت ښاروالۍ مسولینو د هر هغه نانوایي څخه چې د ډوډۍ وزن یې کمه و، ۵۰۰ افغانۍ جریمه اخیستله او اوس ۵۰۰۰ افغانۍ جریمه اخلي.
ده وویل، څرنګه چې د ښاروالۍ جریمه تر ۵۰۰۰ افغانیو لوړېدلی شي؛ نو دوی هم غواړي، چې د یوې ډوډۍ بیه ۲۰ افغانیو ته پورته شي.
رسول یار خبرداری ورکوي، تر هغه به دې اعتصاب ته دوام ورکوي، تر څو د ښار والۍ له لوري د یوې ډوډې بیه ۲۰ افغانیو ته نه وي لوړه شوي.
په ورته وخت کې د کندهار ښاروالۍ ویاند زمری څرګند وايي، چې څو ځلې یې د نانوایانو د اتحادیې له غړو، د ولایتي شورا له استازو او د دغه ولایت د ښاروالۍ له مسولینو سره د دغې ستونزې د حل په اړه خبرې کړي دي، خو په دې برخه کې د پام وړ پایلې ته نه دي رسېدلي.
څرګند وايي، چې د هرې یوې ډوډۍ د پلور له پاره ۱۴ افغانۍ معیار ټاکل شوی دی او نانوایان یې د بیو زیاتېدلو غوښتنه کوي.
په کندهار ښار کې نانوایانو په داسې حال کې سراسري اعتصاب کړی دی، چې له دې مخکې په دې ښار کې ټولټال ۱۱۰۰ نانوایانو ډوډۍ پخوله.
