د پولیسو یوې باوري سرچینې د نوم نه خپرولو په شرط سلام وطندار ته وویل، چې وسله والو طالبانو نن ګهیځ د کندوز مرکز اړوند د باغ میري ښوونځي په سیمه کې ۳۰۳ بس چې تخار ته تللو درولی او ۴ تنه مسافر یې ترې ښکته کړي دي.
سرچینه وايي، د تښتول شويو کسانو هویت معلوم نه دی؛ خو ویل کېږي، چې دوی نظامي کسان دي.
وسله والو طالبانو دغه کسان نا معلوم ځای ته له ځانه سره وړي دي.
دوه اوونۍ مخکې هم وسله والو طالبانو له همدې لویې لارې دوه تنه مسافر تښتولي وو، چې بېرته یې راخوشې کړل.
د ریپوټونو له مخې، د کندوز ـ تخار لویه لار یو له ناامنو لویو لارو ده، چې ځینې وختونه وسله وال طالبان د لارې په اوږدو کې راوځي، د مسافرو موټر پلټي او یو شمېر مسافر له ځانه سره بیايي.
