ځينو مدني فعالانو، د ولايتي شورا استازو او ځوانانو فاریاب ولایت ته د افغان حکومت د نه پاملرنې په اعتراض لاریون وکړ او د اعتراض په ډول يې د ولایت دروازو ته کولپونه واچول.
دغو لاریون کوونکو پر حکومت د فاریاب ولایت په هکله د ناغېړۍ شعارونه ورکول او له لوړ پوړو چارواکو يې غوښتنه وکړه، چې ژر تر ژره دې دغه ولایت ته والي او امنيې قومندان ور و پېژني.
د فاریاب پخوانی سرپرست والي څو ورځې وړاندې د بغلان د والي په توګه وپېژندل شو او همدارنګه کله، چې تېر کال د ولسمشر له لوري د دغه ولایت امنيه قومندان سرپرست معرفي شو، نو دنده يې پرېښوده.
دغه اعتراض کوونکي " مسوولانو ويښ شئ، فاریاب ته جدي پاملرنه وکړئ، موږ خدمتګاره مسوولين غواړو نه موټر سواره، ولایت مو وتړل ترڅو له خوبه ويښ شئ، فاریاب زړه سوی شخص غواړي، د کندوز ناورین په فاریاب کې مه تکراروئ" شعارونه له ځانونو سره لېږدول.
همدارنګه دوی له حکومته غوښتنه وکړه، چې د ياد ولایت امنيتي وضعيت ته دې جدي پاملرنه وکړي.
دوی له حکومته د فاریاب اوسېدونکو ته د کاري فرصتونو غوښتونکي هم شول.
لاریون کوونکو خبرداری ورکړ، چې د حکومت نه پاملرنې په صورت کې به خپلو مدني حرکتونو ته زور ورکړي.
د فاریاب ولايتي شورا غړی عبدالاحد بېک وايي، چې د دوو میاشتو راهیسې د دغه ولایت امنيت ورځ تر بلې خرابيږي، خو حکومتي مقامات په خپلو کې په سياسي ناندريو اخته دي.
د یاد ولایت یوتن مدني فعال جاوید کېوان وايي، چې طالبان هڅه کوي، چې خپل نظامي حضور په دغه ولایت کې پياوړی کړي.
هغه زياتوي، مخکې له دې چې د کندوز ناورین تکرار شي باید د دغه ولایت راتلونکی معلوم شي.
د راپورونو پر بنسټ طالبان د دوو میاشتو راهیسې په دغه ولایت کې خپل نفوذ زیات کړی.
دوی په دې وروستيو کې له څو خواوو د فاریاب پر مرکز ميمنې ښار بریدونه وکړل؛ خو په نيولو يې بریالي نه شول.
همدارنګه دوی، څه موده وړاندې د ګرزيوان ولسوالۍ هم ونيوه، چې وروسته بیا د امنيتي ځواکونو له لوري بېرته د دولت په ولکه کې شوه.
داسې هم ویل کيږي، چې اوسمهال د غورماچ ولسوالۍ ځينې سيمې د طالبانو په لاس کې دي.
