د فاریاب ولایت په قېصار ولسوالۍ کې سیمه ییزو پولیسو ۳ امنیتي پوستې او ۲ کلي وسله والو طالبانو ته پرېښي دي.
په فاریاب کې د ۲۰۹ شاهین قول اردو د لومړۍ لوا ویاند محمد رضا رضايي سلام وطندار ته وویل، سیمه ییزو پولیسو له وسله والو طالبانو سره معامله کړې او د قیصار ولسوالۍ دوه امنیتي پوستې او درې کلي يي ورته سپارلي دي.
خو طالبانو بيا ادعا کړې، چې د کته ولنګ په سیمه کې یوه قرار ګاه او څلور پوستې نیولي يي دي.
د قېصار ولسوالۍ د پولیسو قومندانۍ مرستیال نظام الدین او د سلو سیمه ییزو پولیسو قومندان، د ۲۰۹ شاهین قول اردو د لومړۍ لوا ویاند څرګندونې ردوي.
دوی وايي، نږدې ۲۰۰۰ وسله والو طالبانو له بادغیس او غور ولایتونو، همدارنګه د فاریاب له ولسوالیو د سیمه ییزو پولیسو پر پوستو بریدونه وکړل او له ۲۴ ساعتونو اوږدې نښتې وروسته د سیمه ییزو پولیسو نظامي تجهیزات خلاص شول، چې له امله يې دغو پوستو سقوط وکړ.
نظام الدین، زیاته کړه د قېصار ولسوالۍ په درېيو ورستیو ورځونیو نښتو کې ۳ سیمه ییز پولیس مړه او ۸ نور ټپیان شوي دي.
د ۲۰۹ شاهین قول اردو د لومړۍ لوا ویاند وايي، د خنجر ۲۸ په نوم عملیات له ۲ ورځو را په دېخوا د ملي اردو په رهبرۍ قېصار ولسوالۍ کې پېل شوي او سیمې ته تازه دمي ځواکونه د ملي اردو د کمانډويي ځواکونو په ګډون هم استول شوي دي.
درې ورځې کیږي، چې امنیتي ځواکونه له طالب وسله والو سره د قېصار په ولسوالۍ کې په جګړه بوخت دي.
له بلې خوا د قېصار سیمه ییز چارواکي وايي، د دې نښتو په پاېله کې په زرګونه کورنۍ له باشبلمسټ او کته ولنګ کلیو څخه ګډه شوي دي.
د قېصار ولایت اوسیدونکي وايي، که د یادې ولسوالۍ امنیتي حالات ته پاملرنه ونه شي دغه ولسوالۍ به د وسله والو مخالفیو په لاس ورشي.
