د ملي شورا له خوا د ټاکنیزو کمېسيونونو د تشکیل، واکونو او دندو په اړه د ولسمشر د تقنیني فرمان له ردولو وروسته نن چهارشنبه (جنوري۶مه) د ټاکنو خپلواک کمېسیون یو ځل بیا ډګر ته راووت.
د ټاکنو د خپلواک کمېسیون رییس ډاکټر احمد یوسف نورستاني په کابل کې د يوې خبرې غونډې پرمهال وویل، له یوه کال ډېره موده کيږي، چې د ټاکنو خپلواک کمېسيون سياسي بڼه غوره کړې وه، خو د ملی شورا له خوا د ولسمشر د تفنیني فرمان له ردولو وروسته دغه کمېسیون په تخنیکي او مسلکي توګه خپلو چارو ته دوام ورکوي.
د نورستاني په وینا، د ملي شورا د دواړو مجلسنو له خوا د تقنیني فرمان په ردولو سره، د ټاکنیز نظام د سمون د کمېسیون او غوراوي کمیټې چارې هم پای ته ورسیدې.
د هغه په خبره، دغه دواړه بنسټونه، چې د تفاهم له مخې جوړ شوي وو، قانوني جواز نه لري او دوی به په راتلونکي اوونۍ کې د ولسي جرګې د ټاکنو نیټه اعلان کړي.
نورستاني زیاته کړه، که څه هم د ټاکنو خپلواک کمېسیون په روان کال کې د ولسي جرګې ټاکنو ته بشپړ چمتوالی درلود او د ټاکنو د ترسره کولو له پاره یې دوې نیټې هم ولسمشر ته وړاندې کړې وې، خو د حکومت نه چمتوالی د دې لامل شو، چې دغه ټاکنې په روان لمریز کال کې ترسره نه شي.
په همدې حال کې د ټاکنیزو شکایتونو کمېسیون هم د ملي شورا له خوا دټاکنیزو کمېسیونونو د تشکلاتو، دندو او واکونو په اړه د ولسمشر د تقنیني فرمان له رد هرکلی وکړ.
د دغه کمېسیون رییس عبدالستار سعادت نن خبریالانو ته وویل، چې حکومت باید له قانون څخه لوړو هغو کارونو ته د پای ټکی کیږدي، چې د ټاکنیزو کمېسیونو د بې ثباتۍ لامل کیږي.
نورستاني د ټولو ټاکنو ترسره کول د دغه کمېسیون له اصلی دندو وبلل او زیاته یې کړه، چې له دې وروسته به د کمیسیون خپلواکي وساتي او هیڅ دولتي او غیر دولتي بنسټ ته به اجازه ور نه کړي، چې په چارو کې یې لاس وهنه وکړي.
د ویلو ده، چې په تېرو ولسمشریزو ټاکنو کې د راپورته شویو ستونزو، د پراخو درغلیو د ادعاوو له امله د ټاکنو له بدنامولو وروسته د امریکا د بهرنیو چارو د وزیر جان کري په منځګړیتوب د دوو مخکښو نوماندانو ترمنځ د ملي یووالي پر حکومت هوکړه وشوه او په ټاکنیزو کمیسیونونو کې د سمون راوستل د سیاسي هوکړه لیک مهم ټکی و.
د دې ترڅنګ اروپایي ټولنې هم ګواښ کړی و، که د افغانستان په ټاکنیزو کمېسیونونو کې سمون رامنځته نه شي له راتلونکو ټاکنو به مالي ملاتړ ونه کړي.
