د بدخشان ولایت په خواهان ولسوالۍ کې د ځمکې د ښویېدلو له امله ۵۲ تنه ووژل شول.
د بدخشان مرستیال والي ګل محمد بیدار سلام وطندار ته نن سه شنبې د (اپریل په ۲۸مه) وویل، چې دغه پېښه تېره شپه د شپې ۱۲ بجې د خواهان ولسوالۍ په جیرو کلي کې شوې ده.
د ښاغلي بیدار په خبره په وژل شویو کې ۲۵ ښځې، ۲۲ کوچنیان او ۵ نارینه شامل دي.
ښاغلي بیدار وویل، د نا امنیو له امله د خواهان ولسوالۍ لارې بندي دي او له کابله یې د هیلکوپټرو د مرستې غوښتنه کړې ده.
د بدخشان والي زیاته کړه، د جیرو کلي سره نېږدي پراته کلي د خلکو د ژغورلو لپاره رارسېدلي دي.
سیمه ییزو چارواکیو ویلي، چې درې ورځې وړاندې هم په همدې کلي کې ځمکې حرکت کړی و، چې د خطر له امله یې ۹۰ کورنۍ له سیمي کډه شوې وې.
تېر کال (۲۰۱۴/د مای په ۲مه) هم د بدخشان ولايت په ارګو ولسوالۍ کې د ځمکې ښويېدو پېښې شاوخوا ٤٠٠ کسان مړه کړي وو او په سلګونو کورنۍ یې بې سرپنا کړې وې.
د ارګو ولسوالۍ په اب باريک سيمه کې يوه غونډۍ پر يوه کلي ښويېدلې وه.
