د ولسمشرۍ ماڼۍ لومړي مرستیال عبدالرشید دوستم په جوزجان کې د عملیاتو په شپږمه ورځ وویل، چې دخلکو په کورونو کې د طالبانو پټېدو دې ډلې سره د امنیتي ځواکونو جګړه سخته کړې ده.
دوستم ویلي، د ترکمنستاني ځواکونو سره په هماهنګۍ د وسله والو طالبانوپه خلاف عملیات دوام لري، چې د جګړې د کړۍ راتنګېدو له امله ځېنې طالب وسله وال تېښتې ته اړ شوي دي او همدا ډول د امو سېند ته څېرمه یې لسګونه وسله وال کلابند کړي دي.
د ولسمشر د لومړي مرستیال په وېنا، تر اوسه ۲۰ وسله وال طالبان وژل شوي او ۷ تنه یې نېول شوي دي، د امنيتي ځواکونو ۳ سرتېري وژل شوي او ۴ قوماندانان یې ټپیان شوي دي.
همدا ډول دوستم د جوزجان ولایت د خم اب، مردیان، منګجک او د اقچې ولسواليو له تصفیې وروسته د هېواد په ناامنه جنوبي ولایتونو کې د تصفیوي عملیاتو خبر هم ورکړ.
د طالبانو یو نېول شوي وسله وال قاري محمود ویلي، چې په خم اب کې د عملیاتو د شدت له امله ترکمنستان ته تښتېدلي و، چې په هغه هېواد کې د غذایي اړتیاو له مرستې وروسته بېرته را شړل شوي دي.
هغه زیاتوي چې شمېر یې تر ۸۰ تنو پورې رسيږي، چې له هغې ډلې نږدې ۵۰ ملګري یې د قرقین ولسوالۍ له لارې بلخ ته اوښتي دي.
د خم اب ولسوال انجینیر احمد په دې ولسوالۍ د طالبانو د برید په اړه سلام وطندار ته وویل، چې برېدګرو د ولسوالۍ او امنیې قوماندۍ ودانۍ ویجاړې کړي او په ودانۍ کې پراته اسناد یې سوزولي دي.
په همدې حال کې احمد وايي، چې د دې ودانيو د جوړولو چارې به ژر پېل کړي.
خو بل خوا بیا د خم اب ولسوالۍ اوسېدونکي په دې ولسوالۍ د طالبانو د برید لامل د کمو امنیتي سرتېرو موجودیت په ګوته کوي او زیاتوي چې د ژمنې په رارسېدوسره د جګړو د زور له امله د دوی ستونزې یو په دوه شوي دي.
خو د جوزجان والي؛ چې د خم اب ولسوالۍ د وضعیت څېړنې له پاره هلته تللی وايي هرڅه به ژر سم شي.
