ولسي جرګې په کابل او ننګرهار کې تر وروستیو ترهګریزو بریدونو وروسته، نن د رایو په ډېروالي سره د افغانستان او امریکا ترمنځ پر لاسلیک شوي امنیتي تړون د بیاغور کولو غوښتنه وکړه.
د دې جرګې غړي وايي، که څه هم افغانستان له امریکا سره امنیتي تړون لري، خو هره ورځ هېواد کې ترهګریز بریدونه او د ملکیانو او نظامیانو مرګژوبله ډېرېږي.
د ولسي جرګې غړی محمدسرور عثماني وايي، افغانستان په ناسم امنیتي وضعیت کې دی او له امریکا سره زموږ امنیتي تړون هېڅ ګټه نهده کړې. د نوموړي په وینا، یاد تړون باید پلی یا هم لغوه شي.
په همدې حال کې د ولسي جرګې غړی نذیراحمد حنفي وايي چې امریکا په لوی لاس یاد تړون نهعملي کوي.
ولسي جرګې د افغانستان او امریکا ترمنځ د لاسلیک شوي امنیتي تړون لغوه کولو په اړه تر بحث وروسته، پر یاد تړون د بیاغور کولو موضوع د رایو په ډېروالي تصویب کړه.
د ولسي جرګې غړي داسې مهال د افغانستان او امریکا امنیتي تړون په اړه د بیاغور کولو غوښتنه کوي چې پهدې وروستیو کې د هېواد په کچه ترهګریزو پېښو او جګړو کې د پاموړ زیاتوالی راغلی دی.
تازه تېره ورځ ننګرهار کې د یوه ترهګریز برید له کبله ۶۸ کسان ووژل شول او ۱۶۸ نور ټپیان شول.
