د افغانستان د مالیې پخوانی وزیر او لیکوال عبدالکریم میثاق د پارکینسون د ټوخلې د ناروغۍ له کبله د ۸۰ کالو په عمر ومړ.
نوموړی لیکوال او سیاستپوه په ۱۹۳۵ کال د افغانستان په غزني ولایت کې دې نړۍ ته سترګې وغړولې، د لوړو زده کړو د پای ته له رسولو وروسته یې د حزب دیموکراتیک خلق ګوند غړیتوب تر لاسه کړ. د ۱۹۷۸ او ۱۹۷۹ د نورمحمد خان ترکي او حفیظ الله امین د حکومت په وخت کې د هغه وخت د ماليې وزیر په توګه وټاکل شو.
لیکوال شاعر رهنورد زریاب، چې د خپل عمر ډېر کلونه یې له نومړي سره تېر کړي؛ د هغه په هکله داسې وايي: «مخکې له هغه چې میثاق د وزیر په توګه وګمارل شي، د جمعې په ورځو کې به مو ادبي ناستې درلودې او په بېلابېلو موضوعاتو به مو بحث کول»
د علومو اکاډیمي مشاور اکاډمېسن سلیمان لایق میثاق د لوړ شخصیت خاوند بولي، وايي چې په هغه وخت کې ډېر کم داسې لیکوالان او روڼ اندي وو، چې په ډېرو کمو امکاناتو یې ځانونه د سیاست په ډګر کې وځلول.
ښاغلی لایق نوموړی د ښه مدیریت په برخه کې مخکښ ګڼي، وايي، کله چې میثاق د وزیر په توګه وټاکل شو؛ د هېواد حالات ډېر کړکېچن وو؛ خو میثاق ستونزو ته تر ډېره د حل لاره پیدا کړه.
اروا ښاد عبدالکریم میثاق د ۴۰ مې لسیزې له هغو نوموتو شاعرانو څخه و، چې ډېر لیکلي اثار یې لرل، لکه: ګل پلورنکې نجلۍ، د لنډو کیسو ټولګه، د مور مسکا، شنه لاره، رستم کمان او څو نور یې مهم اثار دي.
اروا ښاد میثاق په ۱۹۹۰زېږدیز کال کې بریتانیا هېواد ته سفر وکړ او د ژوند تر وروستیو ورځو شپو هلته پاتې شو.
