دغه تیاتر نجونو نندارې ته وړاندې کړ او موخه یې د ټولنیز ژوند ټولو په ځانګړې توګه د سولې په راوستلو کې د ښځو ونډه او په کورنیو کې د لور او زوی ترمنځ توپیري چلند نندارې ته ښودل و.
د کابل ښار په سویل لویدیځه څنډه دارالمان ماڼۍ کې نن (پنج شنبه) ورځ « افغان ځوانان په نوي عصر کې » په دې نوم موسیسې یو تیاتر نندارې ته وړاندې کړ.
په دې تیاتر کې د دوو ګاوندیو ترمنځ اړیکې نندارې ته وړاندې کړې، چې له یول بل سره تل پر لانجې او شخړې کوي، خو د دواړو کورنیو لوڼې له یو بل سره خوږې ملګرې دي.
د افغان ځوانان په نوي عصر کې موسیسې مشر محمد اهنګران وویل، چې د دغه تیاتر موخه دا ده، چې سوله باید له کورنیو پیل شي؛ په دې برخه کې د ښځو ونډه ډیره مهمه ده، او ښځې کولی شي په ټولنه کې له نارینه وو سره یوشان کار وکړي.
له بلې خوا د ښځو پراختیایي موسیسې مرستیالې ریحانې عزیزي سلام وطندار ته وویل، چې په یوه کورنۍ، ټولنه او هیواد کې د سولې په راوستو کې د ښځو ونډه ډیره اړینه ده او په دې برخه کې باید مېرمنې وهڅول شي؛ چې د سولې له پاره عملي ګامونه پورته کړي.
د تیاتر په پای کې ګډونوالو په یو غږ وویل، چې سوله ځواک دی، سوله ځواک دی او موږ د سولې راوستو له پاره هر ډول قربانۍ ته چمتو یو.
