د افغان دولت له لوري د اوربند اعلانولو په لومړۍ ورځ طالبانو له چاودېدونکیو توکيو ډک هاموي ټانګ ته د غزني د مقر ولسوالۍ امنیې قوماندانۍ مخې ته چاودنه ورکړه او وروسته یې نښته پیل کړه.
د غزني امنیتي چارواکي تاییدوي چې دغه برید کې ۶ افغان امنیتي ځواکونه وژل شوي او ۲۴ نور ټپیان شوي چې ولسوال او د امنیت مدیر هم پهکې شامل دي.
د مقر ولسوالۍ قومي مشر او د ولایتي شورا پخوانی غړی عبدالولي خانزاده وايي، طالبانو له زابل، هلمند او پکتیکا ولایتونو او ولسوالیو طالب جنګیالي راغونډ کړي او له تېرو درېیوو ورځو راهیسې د مقر ولسوالۍ په امنیتي پوستو پرلپسې بریدونه کړيدي.
د غزني ولایتي شورا استازی حسنرضاء یوسفي د طالبانو اوربند هسې د افغانانو تېراېستل بولي او وايي، غزني په ترینګلي وضعیت کې دي او جګړه ناور، مالستان او جاغوري ولسوالیو ته هم غځېدونکې ده.
هاخوا د غزني امنیې قومندانۍ امنیت امر رمضان علي محسیني وايي، اوس وخت کې وضعیت د امنیتي ځواکونو تر کنټرول لاندې دی او طالبان هم شا تګ ته اړ شويدي.
طالبانو تېره ورځ هم د غزني ښار په شاوخوا پوستو او ۶ ولسوالیو پراخ بریدونه کړي چې د امنیتي چارواکیو په وینا، د ټولو بریدونو مخه یې نیولي.
