ولسي جرګې نن دوشنبې د (جنورۍ پر ۱۶مه) د ۷۰ میلیونو ډالرو په زیاتوالي سره د د رایو په اکثریت سره د ۱۳۹۶ مالي کال د بودیجې دویمه طرحه تصویب کړه.
د جرګې رییس عبدالروف ابراهیمي په عمومي غونډه کې وویل، چې د ۱۳۹۶ مالي کال ټوله بودیجه ۴۲۹ ملیارده افغانۍ کېږي، چې څه د پاسه ۲۶۸ ملیارده افغانۍ یې عادي او ۱۶۱ ملیارده هغه یې پراختیایې بودیجه ده، چې د دوو سرو کارتونو په استثنا تصویب شوه.
له دې مخکې ولسي جرګې د دغې بودیجه مسوده د روان کال په جدي میاشت کې رد کړې وه.
د ولسي جرګې د ماليې او بودیجې کمېسیون مشر امیرخان یار وویل، که څه هم اکثره وکیلان د بودیجې په طرحه کې ستونزه نه ویني؛ خو وايي، چې په بودیجه کې د ۱۰ میلیاردو افغانیو د کسر ترڅنګ په عادي بودیجه کې ۶۳ سلنه د ملي بودیجه سهم راغلی او په پراختیايي هغې کې ۳۷ سلنه د ملي بودیجې سهم شته.
د ده په خبره، د بودیجې ۳۸ سلنه کورنیو سرچینو او ۶۲ سلنه له بهرنیو سرچینو نه جوړه شوې ده.
د بویجې په طرحه کې د ۷۰ میلیونو ډالرو په ارزښت د وکیلانو له خوا ځېنې پروژې وړاندیز شوې وې، چې ماليې وزارت منلې دي.
د مالیې وزیر اکلیل حکیمي په یوې خبرپاڼه کې له ټولو بودیجوي واحدونو څخه غوښتي، چې د امکاناتو، اغېزمنتوب او د افغانستان د ملي ګټو په پام کې نیولو سره د ۱۳۹۶ مالي کال بودیجه مصرف کړي.
د ۱۳۹۶ مالي کال بودیجې طرحه تر دې مخکې هم مالیې وزارت د تصویب له پاره ولسي جرګې ته استولې وه؛ خو د مرغومې پر لومړۍ نېټې د ولسي جرګې له خوا رد شوه.
وزارتونه او دولتي ادارې به خپل وړاندیزونه او نظریې مالیې وزارت ته واستوي او دغه وزارت به د دغو نظریاتو له اورېدلو وروسته د ۱۳۹۶ مالي کال بوديجه نهایي او کاري مراحل به یې بشپړوي.
