د فواید عامې وزارت نن کابل کې د ۱۷۸ میلیونو افغانیو په ارزښت د ۳ پروژو تړونونه لاسلیک کړل. دا پروژې په ۳ ولایتونو کې د ۷۲ کیلومتره سرکونو جوړېدل، پر هغو کریړ اچول او ساتنه څارنه یې رانغاړي.
د فواید عامې وزارت ویاند مهدي روحاني د یادو پروژو تړونونو له لاسلیک وروسته خبریالانو ته وویل چې د سړکجوړونې دا درې پروژې به په جوزجان، غزني او بامیانو کې پلې شي.
د ښاغلي روحاني په وینا، دا پروژې فواید عامې وزارت د کلیوالي لارو ملي پروګرام له لارې پلې کېږي او لګښت یې نړۍوال بانک پر غاړه اخېستی دی.
د فواید عامې وزارت ویاند زیاتوي، د دې پروژو کار به په راتلونکیو څوو ورځو کې پیل او له ۱۲تر ۱۴میاشتو کې بشپړېږي.
د فواید عامې وزارت چارواکیو په وینا، د دې پروژو په بشپړېدو سره سلګونه کسانو ته د کار زمینه برابرېږي.
