د سوداګریو او صنایعو وزارت چارواکي وايي، دوی پر داسې یوې سوداګریزې طرحې کار کوي، چې له نهايي او پلي کېدو وروسته به د سوداګرۍ په برخه کې د هېوادوالو لهپاره زیات سهولتونه رامنځ ته شي.
د معلوماتو پر بنسټ، دغه طرحه د "افغانستان د صادراتو ملي ستراتيژۍ" په اړه ده او اوسمهال پرې کار روان دی، چې په راتلونکو ۶ میاشتو کې به وروستۍ شي.
چارواکي وايي، چې ددې استراتیژی پر بنسټ به په هیواد کې د صادراتو په برخه کې ستونزې حل او د کورنیو تولیداتو ودې ته به زمینه برابره شي.
د سوداګرۍ او صنایعو، کرنې او او مالدارۍ وزیرانو، د سوداګرۍ او صنایعو خونې چارواکو ، یو شمیر سوداګرو او پانګوالو د دوشنبې په ورځ په افغانستان کې د یوې غونډې په ترڅ کې د صادراتو ملي استراتیژۍ په اړه خپلې رایې وکارولې.
غونډې ته د سوداګرۍ او صنایعو وزیر همایون رسا وویل، ددغې استراتیژي په طرحه کې د صادرونکو ټولې ستونزې په پام کې نیول شوي او د صادراتو د ودې په برخه کې سوداګرو او پانګوالو ته زیات امکانات هم برابروي.
د رسا پر وینا، دغه ستراتیژي د غالیو، زعفرانو، انارو، لاسي صنایو، وچو او تازه میوو، د قیمتي او نیمه قیمتي ډبرو له تولیداتو سره مرسته کوي، ترڅو په نړیوالو بازارونو کې سیالۍ وکړي او خپل تولیدات په مناسبه بیه وپلوري.
د سوداګرۍ او صنایو خونې د عامل پلاوي رییس عتیقالله نصرت د برېښنا او ځمکې نشتوالۍ او د صادراتي توکو د کیفیت تصدیق لیکونو نشتون د صادرونکو له سترو ستونزو یاد کړل.
نوموړي زیاته کړه: " هغه لوی لامل چې د صادراتو ودې پر مخ خنډ ګرځیدلی د دولت لهخوا د تولیداتو او صادراتو ودې لهپاره د ملاتړ او د پالسیو ملاتړ نشتون، په تیره د انکشافي صادراتو استراتیژۍ نشتوالۍ ، پورونو ته نهلاسرسۍ د ځمکنیو صادراتي توکو پروسس لهپاره د ځانګړو اقتصادي زونونو نشتوالۍ دغه راز د برښنا نشتون او نورې ستونزې دي چې زموږ د صادراتو پر وړاندې پرتې دي".
خو یوشمیر صادرونکي بیا د دا ډول ستراتیژیو د عملي کیدو په برخه کې حکومت په بېغورۍ تورنوي او وایي، چې د یو څه مودې له تیریدو وروسته څوک د دې استراتیژۍ عملي کیدو ته پام نهکوي.
یو تن صادرونکي حاجي آغا له حکومت وغوښتل د هېواد صاراتو د ودې لهپاره باید د هغوی غوښتنو ته مثبت ځواب ووایي.
د سوداګرۍ او صنایعو خونې چارواکي د هیواد د سوداګرۍ کسر بیلانس اندیښمنونکی بولي او وایي، چې اوسمهال د هیواد ۵سلنه صادرات او ۹۵ سلنه واردات کسر بیلا نس لري.
د سوداګریو او صنایو خونه له حکومته غواړي، چې د سوداګرۍ کسر بیلانس مساوي کیدو لهپاره روښانه پروګرامونه په پام کې ونیسي او د عملي کېدو لهپاره يې هڅې وکړي.
