سویا شیدې دې د امنیتي ځواکونو په خوراکي مینو کې شاملې شي

په کابل کې د سویا شیدو د تولید کارخونې مسوولان وايي، دغه شیدې لوړ خوراکي ارزښت لري او حکومت دې د امنیتي ځواکونو په خوراکي مینو کې ورته ځای ورکړي.

د دغې کارخونې رییس عبدالله فیضي له سلام‌وطندار سره په خبرو کې وویل، که حکومت د سویا شیدو ته چې کورني تولیدات دي، د امنیتي ځواکونو په خوراکي مینو کې ځای ورکړي، نه یوازې هېواد ته به د شیدو واردات کم شي، بلکې د کروندګرو اقتصاد به هم ورسره وغوړېږي.

د سویا شیدو د تولید کارخونې یو کال وړاندې فعالیت پیل کړی او د ورځې ۳ زره لېتره شیدې تولیدوي. د یادې کارخونې د مسوولانو په وینا، فابریکه یې په ورځ کې د ۲۵ زره لېتره شیدو د تولید ظرفیت لري او دوی اوس هڅه کوي چې د خلکو او حکومت پام ورته راواړوي.

په همدې حال کې د کرنې، اوبو لګولو او مالدارۍ وزارت ویاند اکبر رستمي وايي، د ولسمشر د حکم له مخې یاد وزارت هڅه کوي چې د امنیتي ځواکونو په خوراکي مینو کې کورنیو تولیداتو او محصولاتو، په ځانګړې توګه مېوو او د سویا شیدو ته هم ځای ورکړل شي.

د رستمي په وینا، یاد وزارت د سویا شیدو په اړه هم وړاندیز کړی او تمه لري چې د امنیتي ځواکونو په خوارکي مینو کې شامل شي.

د سویا شیدو د تولید کارخونې مسوولان وايي، اوس د ۱۰ ښځو په ګډون ۷۰ کارکوونکي او له ۴ سوه بزګرانو سره د سویا د تولید قراردادونه لري.

د دوی په وینا، که په هېواد کې د سویا شیدو کارول دود او د امنیتي ځواکونو په خوراکي مینو کې شامل شي، د کارخونې د کارګرانو شمېر به ۴ سوو او د سویا د تولید له ۳۵۰۰ بزګرانو سره قراردادونه لاسلیک کړي.