د هندوستان پخوانی مسلمان ولسمشر ابوبکر زین العابدین عبدالکلام تېره ورځ د (جولای په ۲۷مه) د هندوستان په ختیځ کې د تدریس پر مهال د زړه د حملې له کبله د ۸۳ کلونو په عمر ومړ.
عبدالکلام د هندوستان د اداري علومو په یو انسټیټیوټ کې د تدریس پر وخت راوغورځېد او سمدلاسه روغتون ته ولېږدول شو، خو له رسېدا مخکې په لاره کې مړ شوی و.
عبدالکلام په هند کې د توغندیو د پلار په نامه مشهور و، دی د هغې علمي ډلې مشر هم و، چې هندوستان یې د اټومي وسلو څښتن کړ.
عبدالکلام په هندوستان کې لومړنۍ اتومي ازموینه په ۱۹۷۴ ز کال کې تجربه کړې وه.
د عبدالکلام پر مړینه نه یواځې هنديان خواشیني دي، بلکې کابو د نړۍ ټول هغه وګړي، چې له علم سره مینه نه لري د ده پر تشه خواخوږي څرګندوي.
د عبدالکلام په اړه جالب معلومات:
دی له کوم سیاسي حزب پرته په ۲۰۰۲ ز کال کې په غڅ اکثریت سره د هندوستان ولسمشر شو.
د معلوماتو له مخې، ویل کېږي، چې عبدالکلام په بېلابېلو برخو کې د خپلو رسمي زده کړو په ګډون شاوخوا ۳۰ دوکتوراوې لرلې، خو د ۳۱ افتخاري دوکتورا لپاره یې د امریکا د یو پوهنتون غوښتنه رد کړه او ویې ویل، چې نه غواړي د دوکتوراوو شمېر یې ۳۰ واوړي.
نوموړی د هندوستان د تامیل نادو ایالت په یوې غریبې کورنۍ کې چې وړې کیښتۍ یې جوړولې؛ زېږېدلی و.
