له سوريې څخه را رسیدلي راپورونه وايي، چې اوسمهال د دغه هېواد د حلب ښار اوسيدونکي د غذايي موادو له قحط سره مخ دي.
کرم ناصري عکاس او د حلب اوسیدونکی له "سي، این، این" نړېوالې شبکې سره په خبرو اترو کې ویلي، چې اوسمهال د حلب اوسيدونکي ډوډۍ او اوبه نه لري.
هغه ویلي، چې د حلب ښار د اوسيدونکو وضعیت ډېر خراب دی او د دغه ښار پر اوسيدونکو د سختې ویرې فضا حاکمه شوې.
دا په داسې حال کې ده، چې څو ورځې وړاندې د سوريې حلب ښار د دغه هېواد د پوځ له خوا کلا بند شوی و.
د دغه ښار په ختیځو سیمو کې د سوريې د حکومت ضد ځواکونه اوسیږي.
د سوريې د پوځ لوړ پوړي چارواکي وايي، چې تېره چهارشنبه يې د حلب ښار کلابند کړی او دغه ښار ته د تګ راتګ ټولې لارې يې بندې کړې دي.
د سوريې دولتي ټلویزیون د راپور له مخې، د دغه هېواد پوځ غواړي، چې د دولت ضد وسله وال مخالفین باید تسلیم شي.
عکاس کرم ناصري وايي، د حلب اوسيدونکي نه شي کولای چې له ښاره بیرون ووځي.
نوموړي زیاته کړې، چې د ښار ختیځې برخې د اسد د رژیم پلویانو له خوا سخت کلا بند شوی دی.
