ګونتر ګراس (Günter Grass)، د نوبل جایزې کټونکی او د نړۍ له مشهورو لیکوالانو څخه دی. پرون (دوشنبه، د اپریل په ۱۳مه) د ۸۷ کلونو په عمر د المان په شمال کې د لوبک په روغتون کې ومړ.
ناول لیکوال، شاعر، ډرامه لیکوال، انځورګر، مجسمه جوړونکی او المانی نقاش ګونتر ګراس، په ۱۹۲۷زېږديز کال کې د اکتوبر په ۱۶مه د المان په "دانزینګ" ښار کې زېږېدلی و او په ۱۹۸۲ زېږدیز کال کې د المان سوسیال دیموکرات حزب سره یوځای شو.
د دې لیکوال ډېرې لیکنې سیاسي اړخ لري او د سیاست په نړۍ کې یې زیاته غوغا رامنځته کړې وې.
نوموړي په ۱۹۹۹ زیږدیز کال کې د ادبیاتو د نوبل جایزې ګټونکی شو. د نوبل جایزې سره بېره ګراس نورې جایزې لکه د ۱۹۶۵کال جورج بوخنر جایزه، د ۱۹۹۶ زیږدیز کال د توماسمان جایزه، د ۱۹۹۹ زیږدیز کال د پرنس آستوریاس جایزه او د برلین ازاد پوهنتون افتخاري دکتورا، د دې مشور لیکوال له تر لاسه کړیو ویاړونو نه شمېرل کېږي.
ګراس په ۱۹۵۹ زیږدیز کال کې د "طبل حلبي" په نوم ناول ولیکه او د غه ناول ګراس نړیوال شهرت ته ورساوه. له دې ناول څخه په اقتباس سره په همدې نوم یو فلم هم جوړ شو.
د ګراس نقد کوونکیو په دې دلیل چې ده د هټلر په اردو کې ګډون درلود؛ انتقاد کاوه، ګراس له کلونو سکوت وروسته په دې اړه د "د پیاز سپينول" په نوم ناول کې د هټلر اردو ته اشاره وکړه.
د ده د مشهور اثرونو له ډلې نه د "اوسپنیز ډول"، "پيشو او موږک" "د سپيتوب کلونه"، "زما پېړۍ" او د "د پیاز سپینول" یادولی شو.
د گراس اثار د نړۍ په ډېرو ژبو ژباړل شوي دي.
