د نړۍ له نيمايي زیاته شتمني د ۶۲ کسانو په منګلولو کې ده

د اکسفام د راپور له مخې د نړۍ د شتمنو کسانو له ډلې یوازې ۶۲ تنه يې د ټولې نړۍ ۳،۶ میلیارد نفوس د عاید په اندازه سرمایه لري.

اکسفام، چې د فقر سره د مبارزې له پاره نړېوال کنفدراسیون دی د خپلې وروستۍ څيړنې په راپور کې ليکلي؛ سره له دې، چې د ۲۰۱۰ او ۲۰۱۵ م ز کال په نړۍ کې ۴۰۰ میلیونه خلک زیات شوي، خو بیا هم  د نړۍ د کم ګټونکو خلکو ۴۱ سلنه ګټه کمه شوې ده.

په همدې حال کې د نړۍ ۶۲ اربابانو پيسې ۱،۷ میلیارډ ډالر (۱،۷ تریلیون) نه هم زیات شوي دي.

د اکسفام په راپور کې راغلي، چې پنځه کاله مخکې د ټولې نړۍ ۵۰ سلنه ثروت د ۳۸۸ شتمنو په لاس کې وو، چې په ۲۰۱۴م ز کال کې دغو کسانو شمېر ۸۰ تنو ته راټيټ شو او اوسمهال ۶۲ تنه دي.

د اکسفام مرکزي څانګې اجرایوي مدیر "ګلدبرینګ" د دغه راپور په اړه وايي: " ډېر يې ساده وایم، د ټولې نړۍ د ګټې نيمه برخه د یوې خاصې ډلې په ولکه کې ده، چې دا یو غېر عادلانه کار دی"

اکسفام د نړۍ له دولتونو غواړي، چې د ثروت او طبقاتي واټنونو د زیاتوالي د مخنيوي له پاره بېلابېل ستراتيژیانې جوړې کړي.

دغې ټولنې د طبقاتي تضاد په اړه د مبارزې درې ساده او اسانې لارې داسې بیانوي.

لومړی: باید لوی شرکتونه مالیات ورکړي او د تېښتې مخنيوی يې وشي.

دویم: پر هغو کسانو دې پانګونې زیاتې شي، چې ډېر کم عواید لري او د وړو شرکتونو تشویقول.

درېيم: په هغه نړۍ کې، چې په هرو ۹ کسانو کې يې یو شپه په وږي نس تېروي، که چېرې د نړۍ د داسې لويو سرمایه دارانو څخه مالیات ټول کړل شي، نو له ۲۰۰ میلیونو څخه زیات انسانان به په نړۍ کې د فقر له کرښې ووځي.

د بېلګې په توګه که چېرې په افریقا کې د لويو شرکتونو څخه مالیات واخیستل شي، نو هر کال به ۱۴ میلیونه ډالر د افریقې قارې خلکو ته په مستقیم او غېر مستقیمه توګه ورشي.

په دې پېسو سره کېدی شي، چې ۴ میلیونو وګړو ته د یو کال له پاره روغتیايي خدمتونه وړاندې شي او یا که له بې سوادۍ سره مبارزه وشي، نو په همدغو پېسو د افریقې په قاره کې به بیخي بیسوادي له منځه لاړه شي.

اکسفام وعده کړې، چې د نړۍ پر لویو شرکتونو، پانګوالو او نورو کسانو به فشار راوړي، ترڅو د عایداتو پر سر د مالياتو پر ورکړې يې متعهد کړي.