د افغانستان امریکایي پوهنتون رییس کینټ هالند نن په کابل کې یوې خبري غونډې ته وویل چې د دوو کلونو په تېرېدو سره لا هم د دې پوهنتون د تښتول شویو پروفیسرانو د برخلیک په اړه معلومات نهشته.
د ښاغلي هالند په وینا، دواړه پروفیسران یوازې ځوانانو ته د انګلیسي ژبې د لیک ـ لوست او انساندوستۍ حس په پار افغانستان ته راغلي وو او نوره هېڅ موخه یې نهلرله.
د افغانستان امریکایي پوهنتون رییس زیاتوي، هغه ویډیو ـ چې دوه کاله مخکې د دغو پروفیسورانو په اړه د حقاني شبکې خپره کړې وه ـ پهکې ښکارېدل چې روغتیایي وضعیت یې خراب او له روغتیایي خدمتونو هم لېرې دي.
ښاغلی هالند وایي، امریکا د اسټرالیا او افغاندولت په همکاري د دوو پروفیسورانو د خلاصون هڅه کوي؛ خو حقاني شبکه د هغوی د خوشې کولو په بدل کې د افغانستان له زندانونو د خپلو بندیانو خلاصون غوښتي دي.
د ده په وینا، یرغملګر د هغه کس د خلاصون غوښتنه کوي چې د افغاندولت په بند کې دي او امریکایي پوهنتون د افغان دولت په پرېکړو کې لاسوهنه نهشي کولی.
د افغانستان امریکایي پوهنتون رییس زیاتوي، د بندیانو په اړه د افغاندولت پرېکړې ته درناوی کوي او زیات شمېر افغانان د دې ډلې قربانيان کړيدي.
کیوین کینګ او تیموتي ویکس د افغانستان امریکایي پوهنتون دوه پروفیسوران دي چې د حقاني شبکې دوه کاله مخکې له کابله وتښتول.
ویل شوي د امریکا دولت به چا ته یو میلیون ډالر انعام ورکوي چې د تښتول شویو پروفیسورانو ځایځایګي په اړه داسې معلومات ورکړي چې د هغوی ځایځایګي او خلاصون کې مرسته وکړي.
