د هلمند یوشمېر اوسېدونکي اندېښنه ښيي چې په دغه ولایت کې د غنمو د حاصل اخیستو په موسم کې ترلاسه شوي غنم نورو هېوادونو، په تېره پاکستان ته وړل کېږي.
د دوی په وینا، یوشمېر کسان دغه غنم له کروندګرو پېري او بیا یې له ناقانوني لارو پاکستان او نورو هېوادونو ته لېږدوي.
د هلمند اوسېدونکي وايي چې بهر ته د غنمو قاچاق لامل شوی چې دلته یې بیې لوړې شي او که محلي مسوولان یې مخه ونه نیسي، دغه ولایت به د غنمو له کمښت سره مخ شي.
په هلمند کې یو اقتصادي کارپوه لعلمحمد صفا وايي، افغانستان اوس غنمو ته اړتیا لري او نورو هېوادونو ته یې لېږدول به هلمند د غنمو له کمښت سره مخ کړي.
د هلمند د کرنې رییس زلمی الکو هم پاکستان ته له دغه ولایت نه د غنمو قاچاق مني، خو وايي چې د مخنیوي لپاره یې د کرنې او مالیې وزارتونو، امنیتي ادارو او د ګمرکونو معینیت ته خبر ورکړی او ځینې اقدامات هم شوي دي.
د هلمند د کرنې ریاست د معلوماتو له مخې، سږ کال په دغه ولایت کې پر ۱۱۵ زره او ۵۰۰ هکټاره ځمکې غنم کرل شوي او د اټکل له مخې به ۴۴۳ زره ټنه حاصل وکړي.
دا په داسې حال کې ده چې افغانستان هر کال د خلکو د اړتیاوو پوره کولو لپاره له نورو هېوادونو نه لسګونه زره ټنه غنم راواردوي.
