د انرژي او اوبو وزارت چارواکي وايي، چې د دغه هوکړه لیک په لاسلیک سره به د کجکي بريښنا بند د تولید ظرفیت ۱۰۰ میګا واټو ته لوړ شي او همدارنګه د بند د اوبو زیرمه هم ۱،۱ میلیار متر مکعبو ته لوړیږي.
د انرژي او اوبو وزارت چارواکو نن سه شنبه (جون ۷مه) د هلمند کجکي بریښناد بند ظرفیت لوړولو هوکړه لیک د "ترکي ۷۷ " شرکت له مسوولینو سره لاسلیک کړ.
ددغه هوکړه لیک پر بنسټ به یاد شرکت د کجکي بریښنا بند ظرفیت پر لوړولو پانګونه کوي او تر راتلونکو درې میاشتو پورې ددې پروژې څرنګوالي طرح د انرژي او اوبو وزارت ته سپاري.
د انرژي او اوبو وزیر علي احمد عثماني د کجکي بریښنا بند د ظرفیت لوړولو هوکړې لیک په مناسبت غونډې ته چې د ولسمشر محمد اشرف غني په ګډون ارګ کې جوړه شوې وه، وویل، د قراردادي شرکت ژمنې پر بنسټ ددې پروژې دویمه برخه تر درې کلونو پورې ګټې اخیستنې ته سپارل کیږي.
د عثماني پر وینا، د یادې پروژې کار له بشپړیدو وروسته د کجکي بریښنا بند تولید ظرفیت د سلما بند دوه برابره لوړیږي.
هغه زیاته کړه، چې دغه بند به په سیمه کې یو په یو له سترو بندونو بدل شي.
د کجکي بریښنا بند لومړۍ برخه په ۱۳۳۲ لمریز کال کې د ۳۳ میګا واټه بریښنا تولید پر ظرفیت امریکایانو جوړ کړی و.
د هلمند کجکي بریښنا پروژه د افغان دولت له پراختیايي پروژو شمیرل کیږي، چې موخه يې کرنیزو ځمکو ته اوبه رسول او د بريښنا تولید دی.
