د مخابراتي شرکتونو او ښارجوړونې وزارت لانجې

پنځه کال کېږي، چې د افغان بېسیم او اتصالات د مخابراتي شرکتونو انتنونه د کابل ښاریانو په ځانګړي ډول د ښارجوړونې وزارت کار کوونکیو قرباني کوي.

د ښار جوړونې وزارت یوې باوري سرچینې د نوم نه ښودلو په شرط سلام وطندار ته وویل، چې تراوسه د دې دوو مخابراتي شرکتونو د انتنونو د مضره شعاعوو له امله د دوو ښځو جنینونو سقط شوي، د یو تن زړه درېدلی او څلور تنه نور چې د دې انتنونو شاوخوا اوسېدل، مړه شوي دي.

هغه اسناد چې د سلام وطندار لاس ته ورغلي ښيي، چې د افغان بېسیم او اتصالات شرکتونو هغه قرارداد چې په ۱۳۸۹ کال کې د ښار جوړونې وزارت سره شوی، په ډاګه کوي، چې دې دواړو شرکتونو د ښار جوړونې وزارت بام د پنځو کلونو له پاره د (۱۳۹۴ کال د جدي تر ۱۸مې) تاریخه پورې د مخابراتی شعاعوو د خپرولو له پاره په کرا نیولی و‎.

مشخصه نه ده، چې د ښار جوړونې وزارت د کومو ملحوظاتو په نظر کې نیولو سره پرته له دې، چې د مخابراتي شعاعوو جسمي او رواني ستونزې په نظر کې ونیسي؛ قرارداد کړی دی؛ خو د قرارداد د وخت له پوره کېدلو وروسته، د ښار جوړونې وزارت له دواړو مخابراتي شرکتونو نه غوښتي دي، چې خپلې مخابراتي انتنونه د دې وزارت له بامونو لرې کړي، خو شرکتونو تر اوسه د دوی خبرې ته ارزښت نه دی ورکړی.

ویل کېږي، چې مخابراتي شعاعوې انسانانو ته بېلابېلې عصبي او جسمي ناروغۍ پیدا کوي، لکه د نارینه وو کمزوري، د الزایمر او پارکینسون ناروغي، د بدن د دفاعي سېستم کمزوري کول او عصبي اختلالات هغه ناروغۍ دي، چې د مخابراتي شبکو شاوخوا اوسېدونکي پرې اخته کېدلی شي.

د ښار جوړونې وزیر د ۱۳۹۴ د جدي پر لومړۍ نېټه د دې وزارت د تدارکاتو ریاست ته فرمان لېږلی، چې د «مخابراتي انتنونو ضررونو ته په کتو سره» باید له افغان بېسیم او اتصالات مخابراتي شرکتونو سره قرارداد تمدید نه شي. سره له دې، چې  د وزارت او مخابراتي شرکتونو د قراداد له ختمېدلو نه شاوخوا ۴ میاشتې تېرې شوې دي، خو لا هم د دې وزارت پر ودانۍ باندې مخابراتي انتنونه ولاړ دي.

سلام وطندار هڅه وکړه، چې په دې اړه د افغان بېسیم او اتصالات شرکتونو نظرونه راواخلي؛ خو له هڅو وروسته، دواړه شرکتونو خبرو کولو ته حاضر نه شول.

د ښار جوړونې وزارت کارکوونکي خبرداری ورکوي، که چېرې دا دواړه شرکتونه خپل انتنونه د وزارت له بامونو راښکته نه کړي؛ دوی به خپله ورپورته شي او دغه انتنونه به راوغورځوي.