د «الف ټکنالوژۍ» په نامه شرکت چې د مخابراتو او ټکنالوژۍ وزارت نه د مخابراتي شرکتونو سره په ګډه د ۴۵۵ او ۴۵۶ خدمتونو جواز اخیستی، چې ستونزو ته د رسېدنې په نامه له همدې شرکتونو سره په همغږۍ د خدماتو په وړاندې کولو سره له خلکو ډېر لګښت پرېکوي.
د اقتصادي او ټولنیزو چارو شنونکي وايي، چې په اقتصادي لحاظ د طلوع ټلوېزیون او اړوندو رسنیو نه د ۴۵۵ او ۴۵۶ شمېرو خپرېدونکي پیغامونه د ولس له شتمنۍ سره د دوکې او غولولو یو نوی ډول دی، چې ټولنې ته زیان رسوي او هغوی هغو خدمتونو ته چې حق یې وي؛ لاس رسی نهشي پيداکولی.
د اقتصادي چارو شنونکي محب الله شریفي پیسو دا ډول راټولول له ولس سره سراسر ظلم ګڼي او وايي، چې د دې پر ځای دې په یوې واقعيي پالیسۍ کار وکړي، چې هم یې ګټه سالمه وي او هم ولس بېځایه زیان ونه ویني.
د کابل پوهنتون د اقتصاد پوهنځي استاد سیفالدین سیحون وايي، چې یو شمېر رسنۍ د خپلو مادي ګټو د تامین او بقا لهپاره له هر ډول لارو ـ چارو کار اخلي.
د ده پر وینا، دغه ډول رسني د ټولنې له مطالعې وروسته هڅه کوي، چې د هغوی عاطفي او رواني نقطې پيدا کړي او له هماغې لارې د عوایدو د ترلاسه کولو هڅې ګړندۍ کوي.
خو د مخابراتو او ټکنالوژۍ وزارت مسوولان د انټرنټي او اطلاعاتي اسانتیاوو په برخه کې بوخت شرکتونو لهخوا د دا ډول خدمتونو وړاندې کوونکي شرکتونه لهدې وزارت سره ثبت، قانوني او د سهولیتونو په برخه کې یوه پر ځای هڅه بولي.
د دې وزارت ویاند محمد یاسین صمیم وايي، چې د مخابراتو وزارت اړوند «اترا» ادارې کاري جواز ورکړی؛ خو د کار څرنګوالی په قانوني لحاظ د شرکت خپل کار دی.
د صمیم پر وینا، د هرې دقیقې لګښت د مخابراتي شرکتونو او الف ټکنالوژۍ ترمنځ په مساوي ډول وېشل کېږي.
دا پهداسې حال کې ده، چې د پوهنې او روغتیا وزارتونو چارواکي د ۴۵۵ شمېرې پيغامونه د هېوادوالو لهپاره ګټور بولي او وايي، چې لهدې سره یې د ډېرو خلکو ستونزې حل کړېدي.
د دوی پر وینا، استازي یې د هېوادوالو پیغامونه راټولوي او بیا یې ستونزو ته د رسیدنې پهپار اړوندې برخې ته راجع کوي.
خو یو شمېر هېوادوال دا ډول اعلانات خدمتونه نه، بلکې یو ډول سوداګریزه دوکه ګڼي.
د دوی پر وینا، ډېرې کمزورې پوښتنې کوي او د غږ په رسولو کې لهدوی نه ډېرې زیاتې پیسې ګرځوي.
خو د طلوع ټلوېزیون مسوولان د ۴۵۵ او ۴۵۶ خدمتونه ګټور بولي، چې هېوادوال د «الف ټکنالوژۍ» د دې خدمتونو پهواسطه په کم وخت او کم لګښت سره خپلې ستونزې اړوندو ادارو ته رسولی شي. د دوی پر وینا، هېوادوال د یوې اړیکې په نیولو سره د سترو جایزو ګټونکي کېږي او دا هغه څه دي، چې د تفریح او اقتصادي ګټې په پار د هېوادوالو لهپاره ښه مرجع ده.
د طلوع نیوز د مسوولانو پر وینا، د ۴۵۶ خدمتونه په یو دقیقه کې ۱۰ افغانۍ او ۴۵۵ په یوه دقیقه کې ۷ افغانۍ لګښت لري.
لهدې سره هم مهاله د اقتصادي چارو کارپوهان او هېوادوال وړاندیز کوي، چې ټلوېزیوني شبکې دې د دې ډول پيغامونو پرځای داسې خپرونې وکړي، چې د ولس او دولت ترمنځ اړیکې جوړې او د هغوی ستونزې په جدي ډول د حل مناسبه لاره ومومي.
